دہلی کی ایک عدالت میں اس وقت عجیب و غریب صورتحال پیدا ہوگئی جب ایک ملزم نے سماعت کے دوران اچانک فرش پر چاول پھینک دیے۔
وکلا اور عدالت کے عملے نے اسے کالے جادو کی کوشش قرار دے کر سخت احتجاج کیا، جس کے بعد کارروائی کچھ دیر کے لیے معطل ہوگئی۔
واقعہ 11 اگست کو ایڈیشنل سیشن جج شفیع بارنالا ٹنڈن کی عدالت میں پیش آیا۔ عدالت کے مطابق ملزم نے جان بوجھ کر چاول بکھیرے، جس سے ماحول کشیدہ ہوگیا اور وکلا نے مطالبہ کیا کہ فوراً فرش صاف کیا جائے۔
جج نے ملزم کو حکم دیا کہ وہ خود چاول اکٹھے کرے اور ساتھ ہی صفائی کے عملے کو بھی طلب کر لیا۔
یہ بھی پڑھیں:کالا جادو: ایک خاموش جرم یا ریاستی غفلت؟
کارروائی تقریباً 15 سے 20 منٹ معطل رہی کیونکہ بعض وکلا کا کہنا تھا کہ یہ ’کالا جادو‘ ہو سکتا ہے۔ بعدازاں صفائی کے بعد سماعت بحال ہوئی۔
جج نے ریمارکس دیے کہ عدالت انصاف فراہم کرنے کی جگہ ہے اور اس کے تقدس کو ٹھیس پہنچانے والی حرکتیں ناقابلِ برداشت ہیں۔
انہوں نے کہا کہ اس طرح کی حرکات عدالتی نظام کی بنیادوں کو کمزور کرتی ہیں۔
ملزم، جو ایک سرجن بتایا جاتا ہے، نے گھٹنوں کے بل بیٹھ کر معافی مانگی اور اپنے عمل پر ندامت کا اظہار کیا۔
عدالت نے جرم تسلیم کرنے پر اسے ’عدالت کے برخاست ہونے تک قید‘ اور 2 ہزار روپے جرمانے کی سزا سنائی۔
