امریکی وزیرِ خارجہ مارکو روبیو نے کہا ہے کہ واشنگٹن بھارت اورپاکستان کی صورتحال کو روزانہ کی بنیاد پرمانیٹرکررہا ہے،انہوں نے صدرڈونلڈ ٹرمپ کے ان دعوؤں کی بھی تائید کی کہ انہوں نے رواں برس کے آغاز میں دونوں جنوبی ایشیائی حریفوں کے درمیان ممکنہ ایٹمی کشیدگی کو ٹالنے میں کردار ادا کیا۔
امریکی نشریاتی ادارے این بی سی نیوز کو دیے گئے انٹرویو میں مارکو روبیو نے کہا کہ سیز فائر کو برقرار رکھنا ایک مشکل عمل ہے جو اکثر جلد ٹوٹ جاتا ہے۔ ’ہم روزانہ دیکھ رہے ہیں کہ پاکستان اور بھارت کے درمیان کیا پیش رفت ہو رہی ہے۔‘
یہ بھی پڑھیں:پاکستان امریکا تعلقات کو پاک چین دوستی کے تناظر میں نہ دیکھا جائے، اسحاق ڈار
مارکو روبیو کا یہ بیان ایسے وقت میں سامنے آیا ہے، جب صدرٹرمپ بار باردعویٰ کررہے ہیں کہ انہوں نے دونوں ممالک کے درمیان سرحدی جھڑپوں کو روکنے میں کلیدی کردار ادا کیا۔ 10 مئی کو صدر ٹرمپ نے ’فوری اور مکمل‘ جنگ بندی کا اعلان کرتے ہوئے کہا تھا کہ یہ ایک سخت امریکی ثالثی کے نتیجے میں ممکن ہوا۔
اس کے بعد سے امریکی صدرمتعدد بارکہہ چکے ہیں کہ انہوں نے تنازع کو ’حل‘ کرایا اور امن کو تجارت سے جوڑتے ہوئے کہا کہ اگر لڑائی رکی تو امریکا دونوں ممالک سے ’بھرپور تجارتی تعلقات‘ استوار کرے گا۔
مزید پڑھیں: پاکستان کا خطے میں استحکام کے لیے کردار قابلِ تعریف، ڈار روبیو ملاقات کے بعد امریکی اعلامیہ جاری
تاہم بھارت نے مسلسل تیسرے فریق کی مداخلت کو مسترد کیا ہے، وزیرِاعظم نریندر مودی نے پارلیمنٹ کو بتایا کہ کسی غیر ملکی رہنما نے بھارت کو ’آپریشن سندور‘ روکنے کا نہیں کہا، وزیرِ خارجہ ایس جے شنکر کے مطابق سیز فائر کا تعلق تجارت سے نہیں تھا بلکہ پاکستان کو ’شدید نقصان‘ اٹھانے کے بعد خود ہی کشیدگی کم کرنے کی درخواست کرنا پڑی۔
مارکوروبیو نے ایک اورانٹرویو میں صدر ٹرمپ کے ’امن اولین‘ مؤقف کو دہراتے ہوئے کہا کہ موجودہ انتظامیہ نے دنیا بھر میں سفارتکاری کو ترجیح دی ہے۔ ’ہم نے یہ کمبوڈیا اور تھائی لینڈ میں دیکھا، ہم نے یہ بھارت اور پاکستان میں دیکھا، ہم نے یہ روانڈا اور ڈی آر سی میں دیکھا، ہمیں شکر گزار ہونا چاہیے کہ ہمارے پاس ایک صدر ہے جس نے امن کو ترجیح دی۔‘
مزید پڑھیں: امریکا اور پاکستان میں معدنیات اور تیل و گیس کے شعبے میں تعاون پر اتفاق
دوسری جانب، اسلام آباد میں صدرٹرمپ کا بیانیہ پذیرائی حاصل کر رہا ہے، پاکستان نے سیز فائر کا سہرا امریکا کو دیا ہے جبکہ آرمی چیف جنرل عاصم منیر مئی کے بعد سے 2 مرتبہ واشنگٹن کا دورہ کر چکے ہیں، اگرچہ بائیڈن انتظامیہ ٹرمپ کے دعوؤں سے فاصلہ اختیار کیے ہوئے ہے، تاہم دونوں ممالک کے تعلقات میں بہتری کے تناظر میں امریکا نے پاکستان کے ساتھ ایک ’آئل ڈیل‘ کا اعلان بھی کیا ہے۔
جمعے کے روز ولادیمیرپیوٹن سے سربراہی ملاقات سے چند گھنٹے قبل، صدر ٹرمپ نے ایک بار پھر دعویٰ کیا کہ انہوں نے دونوں ملکوں کے درمیان تقریباً ایٹمی ٹکراؤ کو روکا۔ ’وہ تو پہلے ہی طیارے مار گرا رہے تھے، یہ شاید ایٹمی جنگ چھڑجاتی…اور میں نے اسے روک دیا۔‘
