ایک نئی کتاب میں انکشاف ہوا ہے کہ ملکہ الزبتھ دوم نے تخت و تاج کے وراثتی قوانین میں برابری لانے کی تاریخی تبدیلی میں زیادہ دلچسپی نہیں لی۔
برطانوی شاہی امور کے نامہ نگار ویلنٹائن لو کی کتاب ’پاور اینڈ دی پیلس‘ کے مطابق 2013 میں اُس وقت کے وزیرِاعظم ڈیوڈ کیمرون نے فوری طور پر قانون سازی کرتے ہوئے صدیوں پرانی روایت ختم کی، جس کے تحت بیٹے کو بیٹی پر تخت کے لیے فوقیت حاصل تھی۔
یہ بھی پڑھیں: ملکہ الزبتھ دوم کے زیرِ استعمال گاڑی نیلامی کے لیے پیش، متوقع بولی 50 سے 70 ہزار پاؤنڈ
اس اصلاح کے بعد پہلی مرتبہ طے ہوا کہ بادشاہ یا ملکہ کی سب سے بڑی اولاد، خواہ لڑکا ہو یا لڑکی، تخت کی وارث قرار پائے گی۔ یہ فیصلہ پرنس ولیم اور کیٹ کے پہلے بچے کی پیدائش سے قبل کیا گیا، جو بعد میں پرنس جارج ثابت ہوئے۔
کتاب کے مطابق اگرچہ بکنگھم پیلس نے اس اقدام کی مخالفت نہیں کی، لیکن ملکہ الزبتھ نے خود اس قانون سازی میں زیادہ دلچسپی نہیں دکھائی۔ شاہی ذرائع کا کہنا ہے کہ پیلس کا مؤقف واضح تھا کہ یہ فیصلہ حکومت اور دولتِ مشترکہ کے ممالک کی رضامندی سے ہی ممکن ہے۔
یہ بھی پڑھیں: برطانوی کرنسی کی تاریخ کا اہم باب بند: ملکہ الزبتھ کی تصویر والا آخری سکہ جاری
یاد رہے کہ اس قانون کی بدولت شہزادی شارلٹ آج تخت کے جانشینی میں اپنے بڑے بھائی پرنس جارج کے بعد اور چھوٹے بھائی پرنس لوئس سے آگے ہیں۔
