بالی وڈ کی معروف اداکارہ عالیہ بھٹ نے حال ہی میں ایک ٹی وی شو میں شرکت کے دوران اپنے شوہر رنبیر کپور سے شادی کے فیصلے کے بارے میں کھل کر بات کی ہے۔ انہوں نے انکشاف کیا کہ ان دونوں کے درمیان رشتہ محض رومانوی نہیں بلکہ ایک مضبوط دوستی پر مبنی ہے، جو وقت کے ساتھ مزید مستحکم ہوا۔
عالیہ بھٹ اور ورون دھون، جنہوں نے 2012 میں فلم اسٹوڈنٹ آف دی ایئر سے اپنے فلمی کیریئر کا آغاز کیا، حال ہی میں کاجول اور ٹونکل کھنہ کے ٹاک شو میں ایک ساتھ نظر آئے۔ شو کے دوران عالیہ نے رنبیر کپور کے ساتھ اپنے تعلقات، شادی، اور بیٹی راحا کی پیدائش کے بعد زندگی میں آنے والی تبدیلیوں پر گفتگو کی۔
یہ بھی پڑھیں: ’عالیہ بھٹ میری پہلی بیوی نہیں ہے‘ ، رنبیر کپور کا انکشاف
عالیہ نے کہا کہ رنبیر اور میرا رشتہ بہت قدرتی دوستی والا ہے۔ یہ کبھی بھی کسی فلمی انداز کا رشتہ نہیں تھا۔ شروع سے ہی یہ ایک بہترین دوستوں جیسا رشتہ تھا۔ میں نے اس سے شادی اس لیے کی کیونکہ وہ میرے ساتھ، اور بحیثیت انسان، ایک شاندار شخص ہے۔ لیکن سچ یہ ہے کہ مجھے سب سے زیادہ جسے چھیڑنے میں مزہ آتا ہے، وہ رنبیر ہے، اور اسے سب سے زیادہ مجھے چھیڑنے میں مزہ آتا ہے۔ یہی ہماری فطری باہمی کیمسٹری ہے۔
اداکارہ نے مزید انکشاف کیا کہ والدین بننے کے بعد ان کا رشتہ مزید گہرا اور ذمہ دارانہ ہو گیا ہے۔ انہوں نے کہا، راحا کی آمد کے بعد ہماری زندگی مکمل طور پر بدل گئی ہے۔ اب ہم صرف دو افراد نہیں بلکہ ایک خاندان، ایک یونٹ بن چکے ہیں۔
یہ بھی پڑھیں: رنبیر کپور کے ساتھ وائرل تصاویر، ماہرہ خان نے 7سال بعد خاموشی توڑ دی
عالیہ نے یہ بھی یاد دلایا کہ ان کے والد نامور فلم ساز مہیش بھٹ نے رنبیر سے ملاقات کے بعد ان کے رشتے کو دعائیں دیں۔ مذاقاً گفتگو کرتے ہوئے انہوں نے کہا، ’میں سوچ بھی نہیں سکتی کہ راحا کے پاس کوئی لڑکا آئے، رنبیر تو فوراً اُسے لات مار کر باہر نکال دے گا‘۔
