الیکشن کمیشن نے چیئرمین پی ٹی آئی عمران خان کو توہین الیکشن کمیشن مقدمہ میں 23 مئی کو ذاتی حیثیت میں طلب کر لیا ہے۔
ممبر نثار درانی کی سربراہی میں 4 رکنی بینچ نے الیکشن کمیشن میں تحریک انصاف کے چیئرمین عمران خان کے خلاف توہین کمیشن مقدمے کی سماعت کی، بنچ نے استفسار کیا کہ عمران خان کیوں پیش نہیں ہوئے؟ معاون وکیل نے کہا کہ عمران خان نے لاہور ہائیکورٹ میں آج پیش ہونا ہے، عمران خان کے وکیل فیصل چودھری بھی مقدمات میں مصروف ہیں۔
ممبر بلوچستان نے کہا کہ کیوں نہ عمران خان کے قابل ضمانت وارنٹ جاری کر دیں؟ الیکشن کمیشن نے گزشتہ سماعت پر بھی آخری موقع دیا تھا۔ معاون وکیل نے کہا کہ میں نے کمیشن کو آگاہ کرنا تھا، الیکشن کمیشن نے عمران خان کو ذاتی حیثیت میں 23 مئی کو طلب کر لیا۔
