اسرائیل کی غزہ پر تباہ کن جنگ تیسرے سال میں داخل ہو چکی ہے اور اب اس کے خلاف مخالفت صرف عالمی سطح پر ہی نہیں بلکہ خود یہودی برادری کے اندر سے بھی اٹھنے لگی ہے۔
میڈیا رپورٹس کے مطابق امریکی یہودیوں کی ایک بڑھتی ہوئی تعداد کھلے عام اسرائیل کی کارروائیوں کو ’جنگی جرائم‘ اور ’نسل کشی‘ قرار دے رہی ہے، جو ماضی میں غیر متزلزل سمجھی جانے والی اسرائیل کے لیے بیرون ملک مقیم یہودیوں کی جانب سے حمایت میں ایک بڑی دراڑ کی نشاندہی کرتی ہے۔
یہ بھی پڑھیں:غزہ جنگ: اسرائیلی فوجی بدترین نفسیاتی مسائل سے دوچار، 43 فوجیوں کی خودکشی
یہ تبدیلی دراصل 7 اکتوبر 2023 کے حماس حملے کے بعد شروع ہونے والے طویل فوجی آپریشن کے خلاف عالمی ردعمل کا حصہ ہے، واشنگٹن سے سڈنی تک عوامی رائے اسرائیل کے خلاف ہوتی جا رہی ہے۔
US Jews are turning against the Israeli regime. Washington Post poll of US American Jews:
61% say Israel has committed war crimes.
40% say what Israel has done is genocide.
48% overall disapprove of Israel's policies and 46% support them. pic.twitter.com/1ppbkOE7GS— tim anderson (@timand2037) October 5, 2025
ایک حالیہ سروے کے مطابق 42 فیصد امریکی بالغ افراد نے ٹرمپ انتظامیہ کی اس تنازعے سے نمٹنے کی پالیسی پر عدم اطمینان ظاہر کیا، جبکہ آسٹریلیا میں اسرائیلی قیادت پر پابندیوں کی حمایت بڑھ رہی ہے، خود اسرائیل میں بھی اکثریت اب سمجھتی ہے کہ غزہ کی جنگ ختم ہونی چاہیے۔
واشنگٹن پوسٹ کے ایک سروے کے مطابق 61 فیصد امریکی یہودیوں کا ماننا ہے کہ اسرائیل نے غزہ میں جنگی جرائم کیے ہیں، جبکہ تقریباً 40 فیصد اسے فلسطینیوں کے خلاف نسل کشی کے مترادف قرار دیتے ہیں۔
ایک تہائی کے قریب افراد کا کہنا ہے کہ امریکا اسرائیل کی حد سے زیادہ حمایت کر رہا ہے، جبکہ دو تہائی سے زیادہ وزیر اعظم بنیامین نیتن یاہو کی قیادت کو منفی انداز میں دیکھتے ہیں۔
مزید پڑھیں: لاطینی امریکا کے رہنما اسرائیل مخالف مؤقف کیوں اپناتے ہیں؟
اس کے باوجود بیشتر امریکی یہودی اسرائیل سے جذباتی وابستگی رکھتے ہیں، اس کے وجود کو یہودی قوم کے مستقبل کے لیے ضروری سمجھتے ہیں اور امریکا کی فوجی امداد جاری رکھنے کے حامی ہیں۔ تاہم تقریباً ایک تہائی نے کہا کہ وہ خود امریکا میں محفوظ محسوس نہیں کرتے۔
سروے میں یہ بھی بتایا گیا کہ 80 فیصد یا اس سے زیادہ امریکی یہودی غزہ میں شہری ہلاکتوں، حماس کے قبضے میں اسرائیلی یرغمالیوں اور اسرائیلی فوجیوں کی سلامتی پر تشویش رکھتے ہیں۔ اکثریت نے کہا کہ جنگ کے جاری رہنے کی ذمہ داری اسرائیل، حماس، نیتن یاہو اور امریکا سب پر عائد ہوتی ہے۔
پیو ریسرچ سینٹر کے ایک سروے کے مطابق تقریباً 2 سال بعد امریکی عوام میں اسرائیل کی جنگی پالیسی اور حکومت کے بارے میں بداعتمادی میں اضافہ ہوا ہے۔
مزید پڑھیں: اسرائیلی وزیراعظم کا دورہ امریکا، یہودیوں نے احتجاج کیوں کیا؟
اب 59 فیصد امریکی اسرائیلی حکومت کو منفی انداز میں دیکھتے ہیں، جو 2024 کے آغاز میں 51 فیصد تھی۔ 39 فیصد کا خیال ہے کہ اسرائیل غزہ میں حد عبور کرتا جا رہا ہے۔
سروے میں یہ بھی ظاہر ہوا کہ 33 فیصد امریکی سمجھتے ہیں کہ امریکا اسرائیل کو ضرورت سے زیادہ فوجی امداد دے رہا ہے، جبکہ 35 فیصد کے نزدیک غزہ کے شہریوں کے لیے انسانی امداد ناکافی ہے۔ تقریباً 80 فیصد امریکیوں نے فلسطینی شہریوں کی ہلاکتوں، بھوک اور یرغمالیوں کی صورتحال پر تشویش ظاہر کی۔
مزید پڑھیں: امریکا اقوام متحدہ کے اجلاس کے موقع پر ویزے کیوں روک رہا ہے؟
آسٹریلیا میں کیے گئے ایک پول کے مطابق 69 فیصد شہری اسرائیل کی غزہ پر فوجی کارروائی ختم کرنے کے حامی ہیں، جن میں سے 53 فیصد نے اس موقف کی ’پوری طرح‘حمایت کی۔ نصف سے زیادہ آسٹریلوی عوام چاہتے ہیں کہ ان کی حکومت روس پرعائد پابندیوں کی طرح اسرائیل پر بھی سخت اقدامات کرے۔
اسرائیل ڈیموکریسی انسٹی ٹیوٹ کے مطابق 66 فیصد اسرائیلی اب سمجھتے ہیں کہ جنگ ختم کرنے کا وقت آ چکا ہے، اور اس کی سب سے بڑی وجہ یرغمالیوں کی جانوں کو لاحق خطرہ ہے۔
مزید پڑھیں: جان ایف کینیڈی کے قتل کی کہانی میں اسرائیل کا نام، مارجری گرین ٹیلر نے نئی بحث چھیڑ دی
فارن پالیسی میگزین کے ایک تجزیے کے مطابق 7 اکتوبر 2023 کے واقعات نے اسرائیل کو بنیادی طور پر بدل کر رکھ دیا، اگرچہ بڑے پیمانے پر تباہی اور بحران کی پیش گوئیاں جزوی طور پر درست ثابت نہیں ہوئیں، لیکن اسرائیل کو اقتصادی سست روی اور سیاسی بےاعتمادی کا سامنا ضرور ہے۔
اسرائیل کی نسل کش جنگ میں گزشتہ 2 سالوں کے دوران 67 ہزار سے زائد فلسطینی ہلاک ہو چکے ہیں، جبکہ حماس کے مطابق 7 اکتوبر کا حملہ ’فلسطینی مزاحمت کو مٹانے کی کوششوں کے جواب میں تاریخی کارروائی‘ تھی، اسرائیلی اعدادوشمار کے مطابق اس حملے میں 1,219 افراد مارے گئے تھے۔
