جماعتِ اسلامی کے رکن سندھ اسمبلی محمد فاروق نے ای ٹریفک چالان کے خلاف صوبائی اسمبلی میں قرارداد جمع کرادی ہے۔
ان کا کہنا ہے کہ کراچی کے شہری پہلے ہی ٹوٹی سڑکوں اور غائب ٹریفک نشانات کے عذاب میں مبتلا ہیں، اب ان پر بھاری چالان مسلط کر کے مزید ظلم کیا جا رہا ہے۔
یہ بھی پڑھیں:کراچی: ڈی آئی جی ٹریفک قانون کی خلاف ورزی پر ای چالان کی زد میں آگئے
محمد فاروق نے مؤقف اختیار کیا کہ غریب موٹر سائیکل سواروں پر ہزاروں روپے کے چالان لگانا ظلم ہے۔ پنجاب میں یہی خلاف ورزی 200 روپے میں ختم ہوتی ہے، لیکن سندھ میں 5 ہزار کا جرمانہ لگایا جا رہا ہے یہ کہاں کا انصاف ہے؟
ان کا کہنا تھا کہ کراچی کے شہری دوہری سزا بھگت رہے ہیں، ایک طرف خستہ حال سڑکیں اور دوسری جانب ای چالان کے نام پر لوٹ مار۔ ٹریفک پولیس شہریوں کو تنگ کرنے کے بجائے نظام درست کرے۔ ای چالان تنبیہ کے لیے ہونا چاہیے، اذیت کے لیے نہیں۔
یہ بھی پڑھیں:کراچی میں ای چالان نظام کے نفاذ کے بعد ٹریفک قوانین کی مؤثر نگرانی، ہزاروں چالان جاری
محمد فاروق نے مطالبہ کیا کہ حکومت فوری طور پر بھاری چالانوں کا نوٹیفکیشن واپس لے، شہریوں کو ریلیف فراہم کرے اور شہر کے نامکمل ترقیاتی منصوبوں کو جلد از جلد مکمل کرے۔
رکنِ اسمبلی کا کہنا تھا کہ کیمروں سے مجرم پکڑے جائیں، شہری نہیں۔ کراچی کے عوام کے ساتھ امتیازی سلوک کسی صورت قبول نہیں کیا جا سکتا۔
