وزیر اعظم شہباز شریف کی زیر صدارت وفاقی کابینہ کے اجلاس کا اعلامیہ جاری

وزیراعظم محمد شہباز شریف کی زیرِ صدارت وزیر اعظم ہاؤس میں منعقد ہونے والے وفاقی کابینہ کے اجلاس کا اعلامیہ جاری کر دیا گیا، وفاقی کابینہ کے اجلاس میں قومی سلامتی کے اجلاس کے دوران کئے گئے فیصلوں کی توثیق کی گئی۔

کابینہ اجلاس کے دوران وفاقی کابینہ کے اراکین کا خیرمقدم کرتے ہوئے وزیراعظم نے اُن کو پاک ایران سرحد کے دورے کے بارے میں تفصیلات سے آگاہ کیا۔ وزیراعظم نے کہا کہ ایرانی صدر کی ذاتی دلچسپی اور وزیراعظم کی ذاتی نگرانی میں ایران سے 100 میگا واٹ سستی بجلی کی درآمد کا منصوبہ قلیل مدت میں مکمل ہوا۔

پاک ایران دورے سے متعلق مزید کہا کہ عرصہ دراز سے التواء کا شکار اس منصوبے کے تحت بلوچستان خصوصاً گوادر میں بجلی کی ترسیل یقینی بنائی جائے گی۔

وزیر اعظم نے کہا کہ مند تا پشین بارڈر مارکیٹ کا بھی افتتاح کیا گیا، جس سے پاک ایران سرحد کے دونوں اطراف کے رہائشیوں کے لیے کاروبار اور روزگار کے نئے مواقع میسر ہوں گے اور ترقی کا نیا سفر شروع ہوگا۔

وزیراعظم نے مزید کہا کہ ایرانی صدر نے پاک ایران تجارت کے باہمی فروغ میں بھی خصوصی دلچسپی کا اظہار کیا ہے۔ اس کے علاوہ زراعت، سائنس و ٹیکنالوجی اور شمسی توانائی کے شعبوں میں تعاون پر بھی مفید بات چیت ہوئی ہے۔ وزیر خارجہ کی سربراہی میں ایک اعلیٰ سطحی وفد ایران کا دورہ کرے گا تاکہ اِن امور پر ٹھوس پیش رفت ہو سکے۔

’دونوں ممالک نے 900 میل طویل سرحد پر دو طرفہ دہشتگردی کو روکنے کے لیے مشترکہ کوششوں پر زور دیا، اور ایرانی صدر کو پاکستان کے دورے کی دعوت دی جو اُنہوں نے قبول کی۔‘

وزیراعظم نے کابینہ ارکان کو سعودی عرب کے ساتھ منگل کے روز دستخط کیے گئے روڈ ٹو مکہ معاہدے کی تفصیلات سے بھی آگاہ کیا، جس سے پاکستانی حاجیوں کی کثیر تعداد مستفید ہوسکے گی۔

’معاہدے کے تحت اسلام آباد ایئرپورٹ سے 26 ہزار حاجیوں کی امیگریشن کا عمل اسلام آباد ایئرپورٹ پر ہی ہوگا‘

وزیر اعظم نے کابینہ ارکان کو ہدایت کی کہ پیٹرول و ڈیزل کی قیمتوں میں کمی کے اثرات کو فوری طور پرعوام تک پہنچایا جائے، وزارتِ داخلہ اور ملک بھر میں ضلعی انتظامیہ دیگر اشیاء کی قیمتوں میں کمی یقینی بنائے، ناجائز منافع خوروں کے خلاف سختی سے ایکشن لیا جائے.