کراچی کے علاقے کیماڑی موچکو کی پولیس نے ایک اہم کارروائی کے دوران فٹبال ٹورنامنٹ میں نوجوان بشیر کو ڈھائی سال قبل چھری کے وار سے قتل کرنے والے مرکزی مفرور و اشتہاری ملزم کو گرفتار کرلیا ہے۔
ایس ایس پی کیماڑی کے مطابق گرفتار ملزم کی شناخت نادر کے نام سے ہوئی ہے اور اسے تکنیکی بنیاد پر تلاش ڈیوائس کے ذریعے گرفتار کیا گیا۔
اس واقعہ کے حوالے سے مقدمہ 11 اپریل 2023 کو تھانہ موچکو میں درج کیا گیا تھا، اور مرکزی ملزم طویل عرصے سے مقدمے میں مفرور تھا، جس کے باعث عدالت نے اسے اشتہاری قرار دیا تھا۔
پولیس نے بتایا کہ مقدمے میں نامزد دیگر 3 مفرور اور اشتہاری ملزمان کو بھی جلد گرفتار کر لیا جائے گا، جبکہ گرفتار ملزم کے خلاف مزید قانونی کارروائی جاری ہے۔
