پاکستان اور بنگلہ دیش کے درمیان براہ راست فضائی رابطے کی بحالی کی جانب اہم پیش رفت سامنے آئی ہے۔ پاکستان کی سول ایوی ایشن اتھارٹی (CAA) نے بنگلہ دیش کی قومی ایئرلائن کو ڈھاکہ سے کراچی کے لیے براہ راست پروازیں چلانے کی اجازت دے دی ہے، جس کے بعد ڈھاکہ کراچی اور کراچی ڈھاکہ پروازوں کا باقاعدہ شیڈول بھی جاری کر دیا گیا ہے۔ یہ اجازت وفاقی حکومت کی منظوری کے بعد دی گئی ہے اور ابتدائی طور پر 30 مارچ 2026 تک مؤثر رہے گی۔
مزید پڑھیں:بھارتی ائیرلائن انڈیگو میں مسافر کو دیے گئے سینڈوچ سے زندہ کیڑا برآمد
ذرائع کے مطابق بنگلہ دیش کی قومی ایئرلائن شاہ جلال انٹرنیشنل ایئرپورٹ ڈھاکہ سے کراچی کے لیے رات 8 بجے روانہ ہوا کرے گی، جو رات 11 بجے جناح انٹرنیشنل ایئرپورٹ کراچی پر لینڈ کرے گی۔ اسی طرح کراچی سے ڈھاکہ کے لیے پرواز رات 12 بجکر 1 منٹ پر روانہ ہوگی۔
سول ایوی ایشن اتھارٹی کے ذرائع کا کہنا ہے کہ وفاقی حکومت کی منظوری کے بعد ڈی جی سول ایوی ایشن نے بنگلہ دیشی ایئرلائن کو براہ راست پروازوں کی اجازت دی ہے۔ ایئرلائن کو پاکستان کی فضائی حدود میں منظور شدہ روٹس استعمال کرنے کی اجازت ہوگی تاہم اسے پرواز سے قبل فلائٹ سے متعلق تمام ضروری معلومات کراچی ایئرپورٹ انتظامیہ کو فراہم کرنا لازمی ہوگا۔
مزید پڑھیں:سنگاپور ائیر لائن کا پاکستان سے فلائٹ آپریشنز کا فیصلہ
ذرائع کے مطابق بنگلہ دیشی ایئرلائن کو یہ اجازت ابتدائی طور پر 30 مارچ 2026 تک دی گئی ہے، جبکہ دونوں ممالک کے درمیان براہ راست پروازوں کے آغاز کا امکان اسی ماہ ظاہر کیا جا رہا ہے۔
یہ اقدام پاکستان اور بنگلہ دیش کے درمیان سفری سہولتوں، تجارتی روابط اور عوامی سطح پر روابط کے فروغ میں اہم سنگِ میل قرار دیا جا رہا ہے۔
