آذربائیجان نیول فورسز کے کمانڈر ریئرایڈمرل شاہین ممدوف نے نیول ہیڈ کوارٹرز اسلام آباد میں چیف آف دی نیول اسٹاف ایڈمرل نوید اشرف سے ملاقات کی۔
ڈائریکٹوریٹ جنرل پبلک ریلیشنز (پاکستان نیوی) کے مطابق نیول ہیڈ کوارٹرز پہنچنے پر چیف آف دی نیول اسٹاف نے معزز مہمان کا پرتپاک استقبال کیا، جہاں پاکستان نیوی کے چاق و چوبند دستے نے انہیں گارڈ آف آنر بھی پیش کیا۔
یہ بھی پڑھیں: اسلام آباد کوخوبصورت بنانے کے لیے آذر بائیجان اورسی ڈی اے کے درمیان شانداراشتراک
بعد ازاں ریئر ایڈمرل شاہین ممدوف نے شہدا کی یادگار پر پھولوں کی چادر چڑھائی اور شہدا کو خراجِ عقیدت پیش کیا۔
ملاقات کے دوران دونوں بحری سربراہان نے باہمی دلچسپی کے امور، خطے کی بحری سلامتی کی موجودہ صورتحال اور تربیت و دفاع کے شعبوں میں تعاون بڑھانے کے امکانات پر تفصیلی تبادلۂ خیال کیا۔
دونوں رہنماؤں نے موجودہ دوطرفہ دفاعی تعلقات کے دائرۂ کار کو مزید مضبوط اورمتنوع بنانے کے عزم کا اعادہ کیا۔
اس موقع پر معزز مہمان کو پاکستان نیوی کے جاری منصوبوں اورپیشہ ورانہ سرگرمیوں سے متعلق ایک جامع بریفنگ بھی دی گئی۔
مزید پڑھیں:آذر بائیجان رعایتی نرخ پر ایل این جی دے گا، پاکستان سے دیگر اہم معاہدے بھی طے پاگئے
پاکستان اور آذربائیجان کے درمیان برادرانہ تعلقات طویل عرصے سے قائم ہیں، جن کی بنیاد باہمی اعتماد اور قریبی بحری تعاون پر ہے۔
’آذربائیجان نیول فورسز کے کمانڈر کا یہ دورہ دونوں ممالک کے درمیان عمومی طور پر اور بالخصوص بحری افواج کے مابین تعاون کو مزید فروغ دینے میں اہم کردار ادا کرے گا۔‘
