بھارتی ریاست اتر پردیش میں ایک غیر معمولی واقعہ سامنے آیا ہے جہاں ایک 14 سالہ لڑکے نے اپنے گھر سے لاکھوں روپے مالیت کے زیورات چرا کر موموز کی لت پوری کرنے کے لیے بیچ دیے۔
اطلاعات کے مطابق لڑکا موموز کا اتنا عادی ہو گیا تھا کہ اس نے خفیہ طور پر گھر کے سونے کے زیورات نکال کر ایک مقامی مومو فروش کو دے دیے۔ وقت کے ساتھ متعدد زیورات غائب ہو گئے تاہم خاندان کو اس کا علم نہیں ہوا۔
یہ بھی پڑھیں: لاہور کے ’موموز بوائے‘ کیا کچھ بنارہے ہیں؟
یہ معاملہ اس وقت سامنے آیا جب لڑکے کی خالہ اپنے والدین کے گھر زیورات لینے آئی۔ الماری کھولنے پر زیورات غائب ملے جس کے بعد خاندان نے پولیس میں شکایت درج کرائی۔ تحقیقات کے دوران یہ معلوم ہوا کہ لڑکا زیورات مومو فروش کو دیتا رہا۔
پولیس کے اہلکار نے بتایا کہ شکایت موصول ہو گئی ہے اور تحقیقات جاری ہیں۔ ملزم کو جلد حراست میں لیا جائے گا۔ پولیس اب مومو فروش کو تلاش کر رہی ہے اور چوری شدہ زیورات کی کل مالیت کا تعین کر رہی ہے۔
