وزیر دفاع خواجہ آصف نے اپوزیشن لیڈر محمود اچکزئی کے فوج سے متعلق بیان کو غیرذمہ دارانہ قرار دے دیا۔
قومی اسمبلی میں خطاب کرتے ہوئے انہوں نے کہاکہ کل اپوزیشن لیڈر نے یہ دعویٰ کیا کہ پاکستان کی فوج صرف 4 ضلعوں کی فوج ہے، جو کہ کسی طور بھی درست نہیں اور اس طرح کے الزامات کی توقع اس عہدے پر بیٹھنے والے سے نہیں تھی۔
یہ بھی پڑھیے: شہدا کے خاندانوں کو کسی صورت تنہا نہیں چھوڑیں گے، وزیراعلیٰ بلوچستان
خواجہ آصف نے کہاکہ پاکستان کی فوج ملک کے ہر خطے کی ہے اور اس کا تشخص قومی سطح پر ہے۔
انہوں نے گذشتہ پانچ سال کے دوران فوجی شہدا کے اعداد و شمار بیان کرتے ہوئے کہا کہ 2021 سے فروری 2026 تک 3141 افراد اپنی جانوں کی قربانی دے چکے ہیں، جن میں 170 افسران، 212 جے سی اوز اور 2759 جوان شامل ہیں۔
’شہدا میں آزاد جموں و کشمیر سے 2034، بلوچستان سے 103، گلگت بلتستان سے 161، خیبرپختونخوا سے 534، پنجاب سے 1657 اور سندھ سے 452 افراد شامل ہیں۔‘
وزیر دفاع نے سوال اٹھایا کہ کیا اس کے بعد بھی کوئی یہ کہہ سکتا ہے کہ پاکستان کی فوج چار ضلعوں کی ہے؟
انہوں نے کہاکہ یہ بیان عہدے کی توہین کے مترادف ہے کیونکہ لیڈر آف اپوزیشن کا عہدہ قومی عہدہ ہے، کسی ضلع کا نہیں، اور فوج کی قربانی کسی صوبے یا ضلع کے نام سے نہیں جڑی۔
خواجہ آصف نے مزید کہاکہ پاک فوج دہشتگردی کے خلاف جنگ میں روزانہ نقصان اٹھا رہی ہے، اور شہدا نے اپنی جانیں وطن کے لیے قربان کی ہیں، نہ کہ کسی سیاسی پارٹی یا ضلع کے لیے۔ انہوں نے اپوزیشن لیڈر محمود اچکزئی کو نصیحت کی کہ نظریات رکھیں مگر فوج پر اٹیک نہ کریں۔
یہ بھی پڑھیے: دہشتگردوں سے لڑتے ہوئے شہید ہونے والے میجر عدیل کی نماز جنازہ ادا، شہدا قوم کا فخر ہیں، فیلڈ مارشل عاصم منیر
قومی اسمبلی نے وزیر دفاع کی پیش کردہ قرارداد بھی متفقہ طور پر منظور کی، جس میں فوج کے ساتھ یکجہتی اور شہدا کو خراج عقیدت پیش کیا گیا۔
