کنگ عبدالعزیز رائل ریزرو ڈیولپمنٹ اتھارٹی نے گرین دہنا ایسوسی ایشن کے اشتراک سے صحرائے الدہنا کے ریتلے علاقے میں 10 ہزار ارتا درخت لگانے کی مہم کا آغاز کردیا ہے۔
مزید پڑھیں: سعودی عرب کی وادی الاحسبہ قدرتی مناظر کی وجہ سے سیاحوں میں مقبول
عرب میڈیا کے مطابق اس منصوبے میں حکومتی اداروں اور تعلیمی اداروں سے تعلق رکھنے والے 300 رضاکار شریک ہیں، جس کا مقصد مقامی ماحولیاتی نظام کی بحالی اور ماحولیاتی ذمہ داری کو فروغ دینا ہے۔
سخت صحرائی موسمی حالات سے مطابقت کی اعلیٰ صلاحیت اور مٹی کو مستحکم کرنے میں مؤثر کردار کے باعث ارتا کا درخت حیاتیاتی تنوع کے فروغ اور صحرائی پھیلاؤ پر قابو پانے کے لیے ایک اسٹریٹجک سرمایہ کاری قرار دیا جا رہا ہے۔
اتھارٹی کے سی ای او نے کہاکہ یہ اشتراک سعودی گرین انیشی ایٹو اور وژن 2030 کے اہداف کے حصول کے لیے درکار ادارہ جاتی ہم آہنگی کی مثال ہے۔
انہوں نے کہاکہ یہ اقدام تحقیق اور کمیونٹی کی شمولیت کے ذریعے آنے والی نسلوں کے لیے قدرتی وسائل کے پائیدار استعمال کو بھی یقینی بناتا ہے۔
