پاکستان تحریک انصاف (پی ٹی آئی) کے بانی عمران خان کی بہنوں نے کل دن 3 بجے بنی گالہ میں اپنی الگ پریس کانفرنس بلا لی۔
دعوت نامہ
بانی چیئرمین پاکستان تحریک انصاف عمران خان کی تینوں بہنیں، علیمہ خانم، نورین نیازی، ڈاکٹر عظمیٰ اور ڈاکٹر نوشیروان برکی کل بروز منگل بوقت تین بج کر تیس منٹ پر بنی گالہ قائد عمران خان کی رہائش گاہ کے باہر اہم پریس کانفرنس کرینگے۔
آپ سے براہ راست کوریج کی استدعا ہے۔…— Sheikh Waqas Akram (@SheikhWaqqas) February 16, 2026
عمران خان کی رہائی کے لیے پارلیمنٹ ہاؤس میں دھرنا جاری ہے، جس میں اپوزیشن لیڈر محمود اچکزئی، علامہ ناصر عباس، بیرسٹر گوہر، اسد قیصر اور دیگر شریک ہیں۔
مزید پڑھیں: پارٹی کے فیصلے کون کرے گا، پی ٹی آئی رہنماؤں نے سر جوڑلیے
اس کے علاوہ خیبرپختونخوا کے مختلف مقامات پر بھی احتجاج جاری ہے، جہاں عمران خان کو علاج معالجے کی سہولیات فراہم کرنے کا مطالبہ کیا جا رہا ہے۔
قبل ازیں پاکستان تحریک انصاف خیبرپختونخوا کے صدر جنید اکبر خان کا کہنا تھا کہ پارٹی کے فیصلے عمران خان کی فیملی کرے گی یا اپوزیشن لیڈر محمود خان اچکزئی کریں گے اس بات کا فیصلہ لیڈرشپ کے اجلاس میں کیا جائے گا۔
پیر کو صحافیوں سے بات چیت کے دوران ان کا کہنا تھا کہ ویسے تو عمران خان کی فیملی کو موجودہ حالات پر زیادہ دکھ ہے لیکن یہ بھی حقیقت ہے کہ عمران خان نے محمود خان اچکزئی کے فیصلوں پر عملدرآمد کرنے کی ہدایت کی ہے۔
جنید اکبر خان کا کہنا تھا کہ سلمان صفدر کے ساتھ ہونے والی حالیہ ملاقات میں عمران خان نے گوہر خان کے لیے پیغام بھجوایا تھا کہ محمود خان اچکزئی جو فیصلے کریں ان پر عمل کیا جائے۔
ایک سوال کے جواب میں جنید اکبر خان نے کہا کہ عمران خان کی صحت کے حوالے سے پی ٹی آئی کا دھرنا جاری رہے گا یا نہیں اس بات کا فیصلہ بھی پارٹی کے اجلاس میں کیا جائے گا۔
مزید پڑھیں: کے پی ہاؤس کا دھرنا پارلیمنٹ منتقل کرنے کا پروگرام، محمود اچکزئی نے سہیل آفریدی کو اپنے پاس بلا لیا
جب ان سے پوچھا گیا کہ اگر پارٹی نے فیصلہ کرلیا کہ بات محمود خان اچکزئی کی مانی جائے گی تو پھر آپ ان لوگوں کا احتجاج ختم کروائیں گے جو عمران خان کے لیے نکلے ہوئے ہیں تو صدر پی ٹی آئی خیبرپختونخوا نے کہا کہ جب ہم نے ان کو بٹھایا ہی نہیں تو اٹھائیں گے کیوں اور ویسے بھی عمران خان کے لیے سڑکوں پر نکلنا لوگوں کا حق ہے۔
