آزاد کشمیر میں مسلم لیگ ن کے گزشتہ روز سامنے آنے والے اختلافات کے بعد پارٹی رہنماؤں کا اجلاس وفاقی وزیر امور کشمیر انجنیئر امیر مقام اور رانا ثنا اللہ کی صدارت میں طلب کیا گیا۔
یہ بھی پڑھیں: مسلم لیگ ن آزاد کشمیر میں اختلافات کھل کر سامنے آ گئے، پارٹی قیادت دست و گریباں
سابق وزیر اعظم آزاد کشمیر راجہ فاروق حیدر سمیت دیگر رہنما انجنیئر امیر مقام کے گھر پہنچ گئے۔ اس موقعے پر مشتاق منہاس، نجیب نقی، طارق فاروق، بیرسٹر افتخار گیلانی اور سردار طارق بھی اجلاس میں شریک ہوئے۔
اجلاس کے دوران آزاد کشمیر کے پارٹی رہنماؤں نے پارٹی صورتحال پر تبادلہ خیال کیا اور اجلاس کے بعد رپورٹ قائد مسلم لیگ ن میاں محمد نواز شریف کو پیش کی جائے گی۔
نواز شریف نے پارٹی میں موجودہ صورتحال کا نوٹس لیتے ہوئے وفاقی وزیر امیر مقام سے رپورٹ طلب کی ہوئی ہے۔
مزید پڑھیے: آزاد کشمیر میں سیاسی ہلچل، راجا ثاقب مجید اور بریگیڈیئر (ر) محمد خان مسلم لیگ ن میں شامل
واضح رہے کہ گزشتہ روز چوہدری طارق فاروق اور بیرسٹر افتخار گیلانی نے متحدہ اپوزیشن کی پریس کانفرنس سے لاتعلقی کا اعلان کیا تھا۔
ن لیگ کے صدر و اپوزیشن لیڈر شاہ غلام قادر اور پارلیمانی لیڈر راجہ فاروق حیدر نے دیگر اپوزیشن کے ہمراہ حکومت کے خلاف پریس کانفرنس کی تھی۔
مزید پڑھیں: مسلم کانفرنس سے اتحاد کا آپشن موجود، پیپلز پارٹی کو امیدوار ہی نہیں مل رہے،شاہ غلام قادر
ذرائع کے مطابق صدر مسلم لیگ ن نواز شریف نے انتخابات سے چند ماہ قبل پارٹی میں اختلافات کا سخت نوٹس لیتے ہوئے وفاقی وزیر امیر مقام سے مفصل رپورٹ طلب کی ہے۔
