معروف امریکی گلوکارہ و اداکارہ سلینا گومز نے حال ہی میں اپنی ذہنی صحت کے حوالے سے کھل کر بات کی اور بتایا کہ بائی پولر ڈس آرڈر کی درست تشخیص تک پہنچنے کا سفر کتنا مشکل تھا۔
سلینا نے بتایا کہ کئی سالوں تک انہیں محسوس ہوتا رہا کہ ان کی زندگی میں کچھ درست نہیں لیکن صحیح تشخیص حاصل کرنا آسان نہیں تھا۔ انہوں نے کہا مجھے معلوم تھا کہ کچھ غلط ہے لیکن مجھے غلط تشخیص دی گئی۔ لوگ مفروضے بنا رہے تھے اور میں مختلف تھراپسٹ کے پاس گئی۔ یہ واقعی پیچیدہ عمل ہے۔
یہ بھی پڑھیں: سلینا گومز نے سوشل میڈیا سے بریک لے لی، کیا پھر سے کیریئر بدل رہی ہیں؟
سلینا نے بتایا کہ انہوں نے اپنی حالت کو سمجھنے کے لیے چار مختلف ریہیب مراکز کا دورہ کیا۔ اس عمل میں صبر، وقت اور ماہرین سے ملاقاتیں شامل تھیں۔ انہوں نے ذہنی صحت کے مسائل سے جوجھنے والے افراد کو یہ مشورہ دیا کہ صحیح مدد تلاش کرنے کی کوشش میں کبھی امید نہ کھوئیں۔
انہوں نے بتایا کہ وہ چار مختلف ریہیب سے گزری تھیں اس سے پہلے کہ وہ اپنی حالت کو مکمل طور پر سمجھ سکیں۔ ان کا کہنا تھا کہ میں بالکل شرمندہ نہیں ہوں کیونکہ میں اب علامات کو جلدی پہچان لیتی ہوں۔ ایک ایسا ساتھی ہونا بہت مددگار ہے جو آپ کی حالت کو سمجھے اور آپ کے مطابق ردعمل دے۔
یہ بھی پڑھیں: ارب پتی افراد کی فہرست میں شامل سیلینا گومز کتنے اثاثوں کی مالک ہیں؟
سلینا گومز نے یہ بھی کہا کہ معاشرتی سطح پر تھراپی اور ذہنی صحت کے بارے میں اب بھی غلط فہمیاں موجود ہیں جس کی وجہ سے بعض لوگ اس سے ہچکچاتے ہیں۔ انہوں نے مزید کہا کہ میرے لیے تھراپی نے بہت سی چیزیں واضح کر دی ہیں۔
