سعودی عرب کی وزارتِ دفاع نے پیر کے روز بتایا ہے کہ شَیبہ آئل فیلڈ کی جانب بڑھنے والے 9 ڈرونز کو صحرائے ربع الخالی میں روک کر تباہ کر دیا گیا۔
وزارت کے مطابق مشرقی صوبے کی طرف داغا گیا ایک بیلسٹک میزائل اور متعدد ڈرونز کو بھی منگل کی صبح مار گرایا گیا۔
یہ بھی پڑھیں: سعودی عرب کی ایران کے حملوں کی مذمت، قومی سلامتی کے لیے تمام اقدامات کا عندیہ
یہ کارروائی ایک ایسے واقعے کے ایک دن بعد سامنے آئی ہے جس میں سعودی عرب کے الخرج گورنریٹ کے ایک رہائشی علاقے میں فوجی گولہ گرنے سے بنگلہ دیش کے 2 شہری جاں بحق جبکہ 12 افراد زخمی ہوگئے تھے۔
سعودی سول ڈیفنس کے مطابق اتوار کی شام یہ فوجی گولہ الخرج میں ایک مرمت اور صفائی کرنے والی کمپنی کے مقام پر گرا جس سے مالی نقصان بھی ہوا۔
#BREAKING Saudi Defense Ministry says it destroyed 9 drones over Rub' al Khali Empty Quarter that were heading toward Shaybah oil field in country's southeast pic.twitter.com/vhdgmhr36M
— Anadolu English (@anadoluagency) March 9, 2026
سعودی عرب نے ان واقعات پر ردِعمل دیتے ہوئے ایران پر خطے میں جارحانہ اقدامات جاری رکھنے کا الزام عائد کیا ہے۔
سعودی وزارتِ خارجہ نے خبردار کیا کہ ایران کی مسلسل کشیدگی نہ صرف سعودی عرب بلکہ خلیج تعاون کونسل اور دیگر ممالک کے لیے خطرہ ہے۔
مزید پڑھیں: سعودی عرب میں پاکستانی سفیر کا اوورسیز کمیونٹی کو صبر و تحمل کا پیغام
پیر کو جاری ایک بیان میں وزارتِ خارجہ نے کہا کہ اگر ایران نے حملوں کا سلسلہ جاری رکھا تو اسے سفارتی، معاشی اور تذویراتی سطح پر شدید نتائج کا سامنا کرنا پڑے گا اور بالآخر سب سے زیادہ نقصان بھی اسی کو ہوگا۔
وزارت کے مطابق یہ حملے کسی بھی صورت میں قابلِ قبول نہیں اور سعودی عرب کو اپنے عوام، سرزمین اور خودمختاری کے تحفظ کے لیے ضروری اقدامات کرنے کا مکمل حق حاصل ہے۔
بیان میں سعودی عرب نے کویت اور متحدہ عرب امارات کی حکومتوں اور عوام سے بھی تعزیت کا اظہار کیا، جن کے متعدد فوجی اور سیکیورٹی اہلکار قومی فرائض انجام دیتے ہوئے جان کی بازی ہار گئے۔
وزارتِ خارجہ نے اس بات کا اعادہ کیا کہ سعودی عرب کویت اور متحدہ عرب امارات کے ساتھ مکمل یکجہتی رکھتا ہے اور ان ممالک کی جانب سے اٹھائے جانے والے ہر ممکن اقدام کے لیے ہر طرح کا تعاون فراہم کرے گا، جبکہ زخمیوں کی جلد صحتیابی کے لیے نیک خواہشات کا اظہار بھی کیا گیا۔
