اسرائیلی فوج نے لبنان کے دارالحکومت بیروت کے جنوبی مضافاتی علاقے داحیہ کو خالی کرنے کی ایک بار پھر دھمکی دیتے ہوئے کہا ہے کہ وہاں جلد حملے کیے جا سکتے ہیں۔
یہ بھی پڑھیں: بیروت میں اسرائیلی فضائی حملہ، 4 افراد جاں بحق، متعدد زخمی
اسرائیلی فوج کی جانب سے جاری انتباہ میں کہا گیا ہے کہ بیروت کے جنوبی حصے میں واقع کئی گنجان آباد علاقوں کو فوری طور پر خالی کر دیا جائے کیونکہ وہاں فوجی کارروائی متوقع ہے۔ داحیہ بیروت کا وہ علاقہ ہے جہاں لاکھوں افراد آباد ہیں۔
اسرائیلی فوج نے خاص طور پر حارۃ حریک، غبیری، لیلکی، الحدث، برج البراجنہ، تحویطۃ الغدیر اور الشیاح کے علاقوں کا نام لیتے ہوئے خبردار کیا ہے کہ ان مقامات پر جلد حملے کیے جا سکتے ہیں۔
دوسری جانب اسرائیلی بمباری کے باعث بیروت کے جنوبی مضافاتی علاقوں سے نقل مکانی کرنے والے شہری بدستور بے گھر ہیں۔ متعدد خاندان شہر کے ساحلی علاقے میں قائم عارضی کیمپوں میں رات گزارنے پر مجبور ہیں۔
مقامی ذرائع کے مطابق مسلسل فضائی حملوں اور دھمکیوں کے باعث علاقے میں خوف و ہراس پایا جاتا ہے جبکہ شہری محفوظ مقامات کی تلاش میں نقل مکانی کر رہے ہیں۔
