کراچی کی ٹوٹی سڑکیں دکھاکر امریکا بتا رہا ہے کہ ایران کو تباہ کردیا، فیصل قریشی کا طنز

بدھ 11 مارچ 2026

پاکستان شوبز انڈسٹری کے معروف اداکار فیصل قریشی نے کراچی کی خستہ حال سڑکوں پر طنزیہ تبصرہ کرتے ہوئے کہا ہے کہ ان کا موازنہ کسی اور ملک کی تباہی سے کرنا مناسب نہیں۔

رمضان ٹرانسمیشن میں گفتگو کے دوران فیصل قریشی نے مزاحیہ انداز میں کہا کہ آج کل سوشل میڈیا پر عجیب دعوے دیکھنے کو مل رہے ہیں۔ انہوں نے کہا کہ ابھی بھی دیکھیں کیا ہو رہا ہے، امریکا کراچی کی سڑکیں دکھا کر کہہ رہا ہے کہ ہم نے ایران کو تباہ کر دیا۔ یہ کریڈٹ آپ کیسے لے سکتے ہیں؟ یہ بالکل غلط ہے کراچی کی سڑکیں آپ نے تباہ نہیں کیں۔

امریکہ کراچی کی سڑکیں دکھا کر کہہ رہا ھے کہ ہم نے ایران تباہ کر دیا 😂 pic.twitter.com/ayVp1wzTJr

— Muzamil (@muzamil_45) March 10, 2026

ان کے اس جملے پر پروگرام میں موجود مہمان اداکارہ ثنا عسکری بھی مسکرا دیں اور ہنستے ہوئے کہا کہ بالکل وہ ہماری سڑکیں ہیں۔

فیصل قریشی کے اس طنزیہ تبصرے پر جہاں پروگرام میں موجود افراد خوب محظوظ ہوئے وہیں سوشل میڈیا صارفین بھی اس پر دلچسپ تبصرے کر رہے ہیں۔ ایک صارف نے کہا کہ پیپلز پارٹی والو آپ کا کریڈٹ امریکا چھیننے کی کوشش کر رہا ہے۔ محمد سلیم نامی صارف کہتے ہیں کہ جس کا کریڈٹ ہو اس کو ملنا چاہیے۔