190 ملین پاؤنڈ کیس: عدالت میں پیش نہ ہونے پر اسپیشل پراسیکیوٹر نیب پر ایک لاکھ روپے جرمانہ

اسلام آباد ہائیکورٹ نے 190 ملین پاؤنڈ کیس میں بانی چیئرمین پاکستان تحریک انصاف عمران خان اور ان کی اہلیہ بشریٰ بی بی کی سزا معطلی کی درخواستوں کی سماعت میں پیش نہ ہونے پر نیب کے اسپیشل پراسیکیوٹر پر ایک لاکھ روپے جرمانہ عائد کر دیا اور کیس کی مزید سماعت ملتوی کر دی۔

یہ بھی پڑھیں: 17 سال قید کا آغاز 190 ملین پاؤنڈ کی سزا کی مدت ختم ہونے پر ہوگا، عطا تارڑ

سماعت اسلام آباد ہائیکورٹ کے چیف جسٹس سردار محمد سرفراز ڈوگر اور جسٹس محمد آصف پر مشتمل دو رکنی بینچ نے سماعت کی۔

عدالت نے نیب کی جانب سے دائر متفرق درخواست پر بانی پی ٹی آئی کو نوٹس بھی جاری کر دیا ہے۔ عدالت نے کیس کی مزید سماعت ملتوی کر دی، جس کے بعد بنچ اٹھ کر چیمبر چلا گیا۔ جبکہ بیرسٹر اعتزاز احسن ، سلمان اکرم راجہ اور عمران خان کی بہنیں اسلام آباد ہائی کورٹ کے سیکریٹری آفس کے باہر موجود رہیں۔

ان کا کہنا تھا کہ ہمیں آئندہ کی تاریخ کے حوالے سے بات کرنی ہے۔ بعد میں عمران خان کی بہنیں چیف جسٹس کے سیکریٹری آفس چلی گئی۔

سماعت سے قبل اہم پیشرفت

190 ملین پاؤنڈ کیس میں سماعت سے قبل اہم پیشرفت اس وقت ہوئی جب نیب نے عمران خان اور بشریٰ بی بی کی سزا معطلی درخواستیں ناقابلِ سماعت قرار دینے کی متفرق درخواست دائر کر دیں۔ درخواست اسپیشل پراسیکیوٹر نیب رافع مقصود نے دائر کی۔

وکالت نامے اور جیل رسائی پر اعتراضات

سماعت کے دوران بانی پی ٹی آئی کے وکیل اعتزاز احسن نے عدالت کو بتایا کہ وہ پاور آف اٹارنی کی تصدیق کے لیے وکلا کو بھیج چکے ہیں لیکن انہیں اڈیالہ جیل کے قریب بھی جانے کی اجازت نہیں دی جا رہی۔ ان کا کہنا تھا کہ عدالت کی ہدایت کے باوجود چار ماہ سے وکالت نامے پر دستخط نہیں کروائے جا رہے۔

چیف جسٹس نے ریمارکس دیے کہ عام طور پر سپرنٹنڈنٹ جیل کے پاس بھیجا گیا وکالت نامہ دستخط کروا دیا جاتا ہے۔ اس پر اعتزاز احسن نے مؤقف اختیار کیا کہ انتظامیہ عدالتوں کے احکامات کو بھی نظرانداز کر رہی ہے اور اکثر حکام کہتے ہیں کہ انہیں ’اوپر سے حکم‘ ملا ہوا ہے۔

مزید پڑھیے: اسلام آباد ہائیکورٹ: 190 ملین پاؤنڈ کیس کے جج کی ڈیپوٹیشن چیلنج، فیصلہ محفوظ

بیرسٹر اعتزاز احسن نے کہا کہ میں نے وکالت نامہ عمران خان سے تصدیق کروانے کے لیے کھوسہ صاحب کو بھجوایا جبکہ وکالت نامہ کے حصول کے لیے مجھے اڈیالہ جیل کے قریب بھی نہیں جانے دیتے، کل عدالت نے ایڈووکیٹ جنرل کو ہدایت کی کہ وکالت نامہ دستخط کروا کر دیں گے لیکن یہ کسی عدالت کو نہیں مانتے ہیں۔

سزا معطلی پر فوری سماعت کی استدعا

عمران خان کے وکیل سلمان صفدر نے عدالت سے استدعا کی کہ سزا معطلی کی درخواستیں 14 ماہ بعد سماعت کے لیے مقرر ہوئی ہیں اس لیے کیس میں مزید التوا نہ دیا جائے اور عدالت دلائل سن کر فیصلہ کر دے۔

انہوں نے مؤقف اختیار کیا کہ نیب اس معاملے میں بارہا التوا مانگ چکی ہے اور آج بھی اسپیشل پراسیکیوٹر عدالت میں موجود نہیں۔ سلمان صفدر نے کہا کہ اگر نیب عدالت کی معاونت نہیں کرنا چاہتی تو عدالت درخواست گزار کا مؤقف سن کر فیصلہ کر دے۔

بیرسڑ سلمان صفدر نے کہا کہ رمضان کا آخری عشرہ شروع ہوچکا ہے عید سر پر ہے جبکہ خواتین کے لیے ہمیشہ آپ نے نرم روّیہ رکھا گیا ہے۔

بیرسٹر سلمان صفدر نے کہا کہ میرے مؤکل کی مجھے ہدایات نہیں ہیں کہ میں میڈیکل گراؤنڈ پر دلائل دوں۔ انہوں نے کہا کہ ہم صرف سماعت مانگ رہے ہیں نتیجہ نہیں مانگ رہے۔ بیرسٹر سلمان صفدر نے عدالت کو بتایا کہ بیرسٹر اعتزاز احسن بھی آج تشریف لائے ہیں جس پر چیف جسٹس سرفراز ڈوگر نے کہا کہ ’بہت شکریہ بیرسٹر اعتزاز احسن صاحب تشریف لائے ہیں‘۔

نیب پراسیکیوٹر نے کہا کہ ہم نے متفرق درخواست دی ہے کہ سزا معطلی کیسے ناقابل سماعت ہے ہم کیس میں دلائل دینے کے لیے تیار ہیں۔

قید تنہائی اور صحت کا معاملہ

سماعت کے دوران اعتزاز احسن نے مؤقف اختیار کیا کہ بانی پی ٹی آئی کو 65 دن تک تنہائی میں رکھا گیا اور اس دوران نہ خاندان سے ملاقات کی اجازت دی گئی اور نہ ہی وکلا سے۔ ان کے مطابق اسی عرصے میں ان کی آنکھ کا مسئلہ پیدا ہوا۔ انہوں نے عدالت سے درخواست کی کہ قیدِ تنہائی کے خلاف ایک واضح فیصلہ دیا جائے جسے آنے والی نسلیں یاد رکھیں گی۔

نیب کا مؤقف

نیب پراسیکیوٹر نے عدالت کو بتایا کہ ادارے نے ایک متفرق درخواست دائر کی ہے اور اس میں سزا معطلی کی درخواستوں کی قابلِ سماعت ہونے پر اعتراضات اٹھائے گئے ہیں۔ پراسیکیوٹر کا کہنا تھا کہ عدالت پہلے اس درخواست پر فریقین سے جواب لے۔