امریکی اخبار دی نیویارک ٹائمز نے اعتراف کیا ہے کہ ایرانی حملوں کے نتیجے میں قریباً ڈیڑھ درجن امریکی تنصیبات کو نقصان پہنچا ہے جبکہ متعدد فوجی ہلاک ہوئے۔
دی نیویارک ٹائمز کے مطابق ایران کے ڈرون اور میزائل حملوں کے نتیجے میں مشرقِ وسطیٰ میں امریکا کی کم از کم 17 فوجی، سفارتی اور فضائی دفاعی تنصیبات کو نقصان پہنچا ہے۔
یہ حملے خطے میں جاری تنازع کے آغاز کے بعد کیے گئے۔
امریکی تنصیبات اور سفارت خانے نشانہ
رپورٹ کے مطابق ایران نے امریکا اور اسرائیل کے حملوں کے جواب میں خطے میں موجود امریکی فوجی اڈوں، سفارت خانوں اور فضائی دفاعی نظام کو نشانہ بنایا۔
ان حملوں کے نتیجے میں بعض مقامات پر امریکی فوجیوں کی ہلاکتیں بھی ہوئیں جبکہ کئی فوجی تنصیبات کو نقصان پہنچا۔
سیٹلائٹ تصاویر سے تصدیق
نیویارک ٹائمز نے اپنی تحقیق میں ہائی ریزولوشن سیٹلائٹ تصاویر، تصدیق شدہ سوشل میڈیا ویڈیوز اور امریکی حکام و ایرانی سرکاری میڈیا کے بیانات کی بنیاد پر کم از کم 17 متاثرہ امریکی مقامات کی نشاندہی کی۔
رپورٹ میں کہا گیا کہ ان میں سے کئی تنصیبات کو ایک سے زیادہ مرتبہ نشانہ بنایا گیا۔
امریکی فوجیوں کی بڑی تعداد زخمی
خبر رساں ادارے کے مطابق ایران کے ساتھ جاری 10 روزہ جنگ میں تقریباً 150 امریکی فوجی زخمی ہوئے ہیں۔
یہ اعداد و شمار اس سے پہلے عوام کے سامنے نہیں آئے تھے۔
پینٹاگون کا ردعمل
بعد ازاں امریکی محکمہ دفاع پینٹاگون نے بیان جاری کرتے ہوئے کہا کہ تقریباً 140 امریکی فوجی زخمی ہوئے ہیں جن میں سے زیادہ تر کو معمولی چوٹیں آئی ہیں۔
پینٹاگون کے ترجمان شان پارنیل کے مطابق آپریشن Epic Fury کے آغاز سے اب تک تقریباً 140 امریکی اہلکار زخمی ہوئے۔ ان میں سے 108 فوجی دوبارہ ڈیوٹی پر واپس آ چکے ہیں جبکہ 8 شدید زخمی اہلکاروں کو اعلیٰ ترین طبی سہولیات فراہم کی جا رہی ہیں
