بدنام زمانہ بھارتی گینگسٹر لاورنس بشنوی کے ساتھیوں نے معروف ریپر و گلوکار بادشاہ کو جان سے مارنے کی دھمکی دی ہے۔ یہ دھمکی اس وقت سامنے آئی جب بادشاہ نے حال ہی میں ہریانوی زبان میں اپنا گانا ٹٹیری ریلیز کیا جس کے بول اور مناظر کو کئی حلقوں نے نامناسب قرار دیا اور سوشل میڈیا پر شدید تنقید کی گئی۔
دھمکی بشنوئی گینگ کے ایک فیس بک پیغام کے ذریعے سامنے آئی، جس میں کہا گیا بادشاہ، تم نے ہرینانہ کی ثقافت خراب کرنے کی کوشش کی۔ پہلے 2024 میں ہم نے کلب میں تمہیں ٹریلر دکھایا اس بار ہم تمہیں سیدھا سر میں ماریں گے۔
یہ بھی پڑھیں: ’لائن پر نہ آئے تو قتل کریں گے‘، رنویر سنگھ کو سنگین دھمکی
ہریانہ پولیس نے اس ماہ کے اوائل میں تصدیق کی کہ انہوں نے ایف آئی آر درج کی ہے اور بادشاہ کے خلاف لوک آؤٹ نوٹس جاری کرنے کا عمل شروع کیا ہے۔ پولیس کا کہنا ہے کہ یہ کارروائی اس الزام پر کی گئی کہ گانے میں لڑکیاں اسکول یونیفارم میں ہرینانہ روڈ ویز بس میں ڈانس کر رہی ہیں اور غیر مناسب اشارے کر رہی ہیں۔
گانا یکم مارچ 2026 کو ریلیز ہوا اور اس میں بادشاہ کے ساتھ گلوکارہ سمراں جگلن نے بھی پرفارم کیا۔ بادشاہ نے انسٹاگرام پر ایک ویڈیو کے ذریعے معافی بھی مانگی اور کہا کہ ان کا کسی کے جذبات کو ٹھیس پہنچانے کا کوئی ارادہ نہیں تھا۔
یہ بھی پڑھیں: گینگسٹر لارنس بشنوئی نے دشمنی ختم کرنے کے لیے سلمان خان سے کتنی رقم کا مطالبہ کیا؟
واضح رہے کہ یہ پہلا واقعہ نہیں ہے۔ 2024 میں بھی بشنوئی گینگ کی جانب سے چندی گڑھ میں بادشاہ کی زیر ملکیت کلب کے باہر دھماکہ کیا گیا تھا۔
