بلوچستان حکومت نے ڈیجیٹل گورننس اور شفاف عوامی خدمات کی فراہمی کی جانب ایک اہم پیشرفت کرتے ہوئے ای ڈومیسائل اور ای لوکل سرٹیفکیٹ سسٹم کا باقاعدہ آغاز کر دیا ہے۔
وزیراعلیٰ بلوچستان کے معاونِ خصوصی برائے میڈیا و سیاسی امور شاہد رند نے پیر کے روز اس فیصلے کا اعلان کیا۔
یہ بھی پڑھیں: حافظ حمداللہ کا شناختی کارڈ بحال کرنے کے خلاف نادرا کی اپیلیں سماعت کے لیے مقرر
بلوچستان کے محکمہ داخلہ نے نیشنل ڈیٹا بیس اینڈ رجسٹریشن اتھارٹی کے تعاون سے انٹیگریٹڈ ڈومیسائل مینجمنٹ سسٹم کے نفاذ کا نوٹیفکیشن بھی جاری کر دیا ہے۔
نئے نظام کے مکمل طور پر فعال ہونے کے بعد صوبے بھر کے شہری کسی بھی نادرا سینٹر، ڈپٹی کمشنر کے دفتر یا پاک آئی ڈی پلیٹ فارم کے ذریعے ای ڈومیسائل اور ای لوکل سرٹیفکیٹ کے لیے درخواست دے سکیں گے۔
حکومتی حکام کے مطابق اس نظام سے غیر ضروری تاخیر کا خاتمہ ہوگا، سفارش اور مڈل مین کے کردار میں کمی آئے گی جبکہ جعلی ڈومیسائل اور لوکل سرٹیفکیٹس کے اجرا کی روک تھام بھی ممکن ہو سکے گی۔
مزید پڑھیں: پاکستانیوں کے لیے بڑی خوشخبری، نادرا سے وراثتی سرٹیفکیٹ کا حصول انتہائی آسان ہوگیا
شاہد رند نے کہا کہ ڈیجیٹل نظام شہریوں کے ریکارڈ کی درستگی، تحفظ اور آسان رسائی کو یقینی بنائے گا۔
اس کے علاوہ سرکاری اداروں اور قانون نافذ کرنے والے اداروں کو صوبہ بھر پر مشتمل ایک قابلِ تصدیق ڈیٹا بیس دستیاب ہوگا، جس سے انتظامی کارکردگی بہتر بنانے اور سکیورٹی نظام کو مزید مؤثر بنانے میں مدد ملے گی۔
