امریکا میں ہونے والی ایک نئی طبی تحقیق میں انکشاف ہوا ہے کہ ٹوائلٹ پر بیٹھ کر اسمارٹ فون استعمال کرنے کی عادت بواسیر جیسے تکلیف دہ مرض کے خطرے میں اضافہ کر سکتی ہے۔
بیتھ اسرائیل ڈیکونیس میڈیکل سینٹر کے محققین نے تحقیق کے دوران بتایا کہ جدید دور کی باتھ روم عادات مقعد کے حصے کی رگوں پر دباؤ بڑھا کر طبی مسائل کو شدید بنا سکتی ہیں۔ تحقیق کی قیادت ڈاکٹر چیتھن رام پرساد نے کی۔
یہ بھی پڑھیں: ناسا کے خلا باز اب خلا میں اسمارٹ فون استعمال کریں گے
یہ تحقیق سائنسی جریدے پلاس ون میں شائع ہوئی جس میں روزمرہ ٹیکنالوجی کے استعمال کے غیر متوقع طبی اثرات پر روشنی ڈالی گئی اور ماہرین صحت کو محفوظ عادات سے متعلق رہنمائی فراہم کی گئی۔
تحقیق میں 125 بالغ افراد کو شامل کیا گیا جو معمول کے کولونوسکوپی معائنے سے گزر رہے تھے۔ شرکا سے ان کی روزمرہ سرگرمیوں اور باتھ روم عادات سے متعلق سوالنامہ پُر کروایا گیا جبکہ ڈاکٹروں نے بواسیر کی موجودگی کا طبی معائنہ بھی کیا۔
نتائج کے مطابق 66 فیصد افراد باتھ روم میں موبائل فون استعمال کرتے تھے، جبکہ نوجوان افراد میں یہ رجحان زیادہ دیکھا گیا۔ اسمارٹ فون استعمال کرنے والوں میں بواسیر ہونے کا خطرہ ان افراد کے مقابلے میں 46 فیصد زیادہ پایا گیا جو فون استعمال نہیں کرتے تھے۔
یہ بھی پڑھیں: اسکرین بچوں کی صحت پر کیا منفی اثرات ڈالتی ہے؟
تحقیق کی سینئر مصنفہ ڈاکٹر ٹریشا پاسریچا کے مطابق اسمارٹ فون کی وجہ سے لوگ ٹوائلٹ میں زیادہ وقت گزارتے ہیں۔ تقریباً 37 فیصد فون استعمال کرنے والوں کو باتھ روم استعمال کرنے میں 5 منٹ سے زیادہ وقت لگا، جبکہ فون استعمال نہ کرنے والوں میں یہ شرح صرف 7 فیصد رہی۔
محققین نے بتایا کہ زیادہ دیر تک ٹوائلٹ پر بیٹھنے سے مقعد کی رگوں پر دباؤ بڑھ جاتا ہے جس کے باعث سوجن، تکلیف اور بعض اوقات خون آنے کی شکایت پیدا ہو سکتی ہے۔
ماہرین نے مشورہ دیا ہے کہ لوگ باتھ روم میں موبائل فون لے جانے سے گریز کریں اور ٹوائلٹ پر گزارے جانے والے وقت کو محدود رکھیں تاکہ بواسیر کے خطرے کو کم کیا جاسکے۔
