واٹس ایپ نے ’گیسٹ چیٹس‘ کے نام سے ایک نئی خصوصیت کی محدود بیٹا ٹیسٹنگ شروع کی ہے جو صارفین کو اکاؤنٹ بنائے بغیر ایپ استعمال کرنے کی سہولت فراہم کرتی ہے۔
اس فیچر کے تحت مہمان صارف محفوظ لنک کے ذریعے واٹس ایپ ویب پر موبائل یا ڈیسک ٹاپ براؤزر سے گفتگو میں شامل ہو سکتے ہیں۔ مارچ 2026 تک یہ خصوصیت اینڈرائیڈ اور آئی او ایس کے محدود بیٹا ٹیسٹرز کے لیے دستیاب ہے۔
یہ بھی پڑھیں: میٹا نے فیس بک، واٹس ایپ اور میسنجر پر اسکیم کی نشاندہی کرنے والے ٹولز متعارف کردیے
مہمان صارف شامل ہونے کے لیے رجسٹرڈ صارف کے بھیجے گئے لنک پر کلک کر کے ’کنٹینیو ایز گیسٹ‘ کا انتخاب کرے گا۔ صارف ایک ڈسپلے نام درج کر کے شامل ہوگا اور اس کا پروفائل رجسٹرڈ صارف کے لیے ’گیسٹ‘ کے ٹیگ کے ساتھ ظاہر ہوگا۔
ہر مہمان سیشن کے لیے ایک منفرد شناختی کوڈ بنایا جاتا ہے جو انکرپشن کی چابی تیار کرتا ہے، تاکہ پیغامات مکمل طور پر نجی رہیں۔ مہمان صارف دعوت دینے والے کا فون نمبر دیکھ سکتا ہے، جبکہ دعوت دینے والا بلا اجازت لنک استعمال کرنے والے مہمان کو بلاک بھی کر سکتا ہے۔
یہ بھی پڑھیں: واٹس ایپ نے بچوں کے لیے والدین کے زیرِ نگرانی اکاؤنٹس متعارف کروا دیے
اس فیچر میں گروپ چیٹس، میڈیا شیئرنگ جیسے تصاویر، ویڈیوز یا اسٹیکرز، اور وائس یا ویڈیو کالز کی سہولت موجود نہیں ہے۔ غیر فعال ہونے کی صورت میں چیٹس 10 دن بعد ختم ہو جاتی ہیں۔
واٹس ایپ کا یہ اقدام ایسے صارفین کو متوجہ کرنے کے لیے ہے جو بغیر رجسٹریشن کے ایپ استعمال کرنا چاہتے ہیں۔ کمپنی نے ابھی اس کی وسیع پیمانے پر ریلیز کی تاریخ کا اعلان نہیں کیا۔
