پاکستان علما کونسل اور انٹرنیشنل تعظیمِ حرمین شریفین کونسل نے حوثیوں کی جانب سے مملکتِ سعودی عرب پر کیے گئے بیلسٹک میزائل حملے کی شدید الفاظ میں مذمت کرتے ہوئے اسے خطے کے امن و استحکام کے لیے خطرناک قرار دیا ہے۔
پاکستان علما کونسل کے چیئرمین اور انٹرنیشنل تعظیمِ حرمین شریفین کونسل کے سیکرiٹری جنرل حافظ محمد طاہر محمود اشرفی کی جانب سے جاری بیان میں کہا گیا ہے کہ سعودی عرب کی دفاعی افواج نے اس حملے کو کامیابی سے ناکام بنا کر مملکت کے مضبوط اور مؤثر دفاعی نظام کا عملی ثبوت دیا ہے۔
بیان میں حوثیوں پر زور دیا گیا کہ وہ ارضِ حرمین شریفین، مملکتِ سعودی عرب، کے خلاف ہر قسم کی جارحیت سے باز رہیں اور ایسا کوئی اقدام نہ کریں جس سے حرمین شریفین، مملکت کی سلامتی، امن اور استحکام کو خطرہ لاحق ہو۔
مزید پڑھیں:عالم اسلام کے نامور علما کی کمیٹی فیصلہ کرے پاکستان کیخلاف حملے جائز ہیں یا نہیں، مولانا طاہر اشرفی
حافظ طاہر محمود اشرفی نے کہا کہ پاکستان علما کونسل اور انٹرنیشنل تعظیمِ حرمین شریفین کونسل مملکتِ سعودی عرب کے دفاع، سلامتی اور استحکام کے لیے سعودی قیادت اور عوام کے ساتھ شانہ بشانہ کھڑی ہیں، اور مملکتِ سعودی عرب کے خلاف کسی بھی قسم کی جارحیت کو ناقابلِ قبول سمجھتی ہیں۔
