آصف علی زرداری کی جانب سے عیدالفطر اور یومِ پاکستان کے موقع پر قیدیوں کی سزاؤں میں خصوصی کمی کی منظوری کے بعد مراد علی شاہ نے بھی سندھ میں قیدیوں کے لیے سزا میں 90 روز کی رعایت کا اعلان کر دیا ہے۔
یہ بھی پڑھیں:صدر مملکت کی عیدالفطر اور یومِ پاکستان کے موقع پر قیدیوں کی سزاؤں میں خصوصی کمی کی منظوری
ایوانِ صدر کے مطابق صدرِ مملکت نے مختلف اہم امور کی منظوری کے ساتھ ساتھ قیدیوں کی سزاؤں میں خصوصی کمی کی بھی اجازت دی، جس کا مقصد عید کے موقع پر انسانی ہمدردی کے تحت ریلیف فراہم کرنا ہے۔
دوسری جانب وزیراعلیٰ سندھ مراد علی شاہ نے اعلان کیا کہ صوبے کی جیلوں میں قیدیوں کو عیدالفطر کے موقع پر 90 دن کی معافی دی جائے گی۔ تاہم انہوں نے واضح کیا کہ یہ رعایت دہشتگردی، جاسوسی، ریاست مخالف سرگرمیوں میں ملوث قیدیوں پر لاگو نہیں ہوگی۔
اسی طرح قتل، زیادتی، اغوا، ڈکیتی، رہزنی، مالی بدعنوانی، منشیات اور قومی خزانے کو نقصان پہنچانے والے مجرم بھی اس رعایت سے مستثنیٰ ہوں گے۔
حکام کے مطابق ان اقدامات کا مقصد عید کے موقع پر مستحق قیدیوں کو ریلیف فراہم کرنا اور اصلاحی عمل کو فروغ دینا ہے۔
