اسلام آباد پولیس نے عیدالفطر کے دوسرے روز بھی سکیورٹی کے سخت انتظامات برقرار رکھتے ہوئے شہر بھر میں 3000 سے زائد اہلکار تعینات کر دیے، جبکہ اعلیٰ افسران خود فیلڈ میں موجود رہ کر صورتحال کی نگرانی کر رہے ہیں۔
انسپکٹر جنرل سید علی ناصر رضوی سکیورٹی انتظامات کی خود نگرانی کر رہے ہیں، جبکہ ڈی آئی جی محمد جواد طارق، ایس ایس پی آپریشنز قاضی علی رضا اور دیگر سینیئر افسران بھی فیلڈ میں موجود ہیں۔
شہر بھر میں سخت سکیورٹی انتظامات
پولیس کے مطابق شہر کے داخلی و خارجی راستوں پر خصوصی پکٹس قائم کی گئی ہیں اور مؤثر چیکنگ کا عمل جاری ہے، جبکہ اہم مقامات، تفریحی مقامات اور ناکہ جات پر سکیورٹی مزید سخت کر دی گئی ہے۔
تمام پٹرولنگ یونٹس کو متحرک کر دیا گیا ہے اور شہر بھر میں مسلسل گشت جاری ہے تاکہ کسی بھی ناخوشگوار واقعے سے بچا جا سکے۔
ون ویلنگ کے خلاف کریک ڈاؤن
پولیس کی جانب سے ون ویلنگ اور ہلڑ بازی کے خلاف بھرپور کارروائیاں جاری ہیں، جبکہ پارکس کو فیملی پارکس قرار دے کر غیر متعلقہ افراد کے داخلے پر پابندی عائد کی گئی ہے۔
پولیس افسران کو ہدایت کی گئی ہے کہ وہ شہریوں اور فیملیز کے ساتھ خوش اخلاقی سے پیش آئیں اور انہیں بہترین سہولیات فراہم کریں۔
پہلے روز کوئی ناخوشگوار واقعہ پیش نہ آیا
ڈی آئی جی محمد جواد طارق کے مطابق عید کے پہلے روز مؤثر سکیورٹی اقدامات کے باعث کوئی ناخوشگوار واقعہ پیش نہیں آیا، جبکہ پولیس اہلکار عید کے ایام میں جذبہ خدمت کے تحت اپنے فرائض انجام دے رہے ہیں۔
