یومِ پاکستان کے موقع پر ملک بھر میں تقریبات کا آغاز قومی جوش و جذبے اور ملی یکجہتی کے ساتھ ہوا۔
وفاقی دارالحکومت اسلام آباد میں 31 جبکہ تمام صوبائی دارالحکومتوں میں 21 توپوں کی سلامی دی گئی، جس سے فضا پاکستان زندہ باد کے نعروں سے گونج اٹھی۔
دن کا آغاز توپوں کی سلامی، وطن سے تجدیدِ عہد اور قومی یکجہتی کے ولولے کے ساتھ کیا گیا۔
یہ بھی پڑھیں: یومِ پاکستان: مسلح افواج کی قوم کو مبارکباد، عزمِ نو کا اعادہ
مساجد میں نمازِ فجر اور قرآن خوانی کے بعد ملکی سلامتی، ترقی، خوشحالی اور اتحاد کے لیے خصوصی دعائیں کی گئیں، جبکہ شہدا کے درجات کی بلندی کے لیے بھی اجتماعات منعقد ہوئے۔
ملک بھر میں اہم سرکاری عمارتوں پر قومی پرچم لہرایا گیا، جو قومی وقار، خودمختاری اور اتحاد کی علامت ہے۔
یومِ پاکستان کی تقریبات میں عوام نے بھرپور شرکت کرتے ہوئے حب الوطنی کا اظہار کیا۔
مزید پڑھیں: دہشتگردی کے سرپرستوں کا مکمل خاتمہ کریں گے، یوم پاکستان پر صدر زرداری کا پیغام
دوسری جانب برفانی سرحدی علاقوں میں تعینات پاک فوج کے جوانوں نے قوم کے نام اپنے پیغام میں غیر متزلزل عزم کا اظہار کیا۔
جوانوں کا کہنا تھا کہ سخت موسمی حالات اور برفانی طوفان بھی ان کے حوصلے پست نہیں کر سکتے اور وہ ملک کی سلامتی کے لیے ہمہ وقت چوکس ہیں۔
پاک فوج کے جوانوں نے اس عزم کا اعادہ کیا کہ وطنِ عزیز کے دفاع کے لیے کسی بھی قربانی سے دریغ نہیں کیا جائے گا اور ہر قیمت پر ملک کی حفاظت کو یقینی بنایا جائے گا۔
