لاگارڈیا ہوائی اڈے پر ایک افسوسناک حادثے میں ایئر کینیڈا کے مسافر طیارے کے فائر بریگیڈ کی گاڑی سے ٹکرا جانے کے نتیجے میں پائلٹ اور معاون پائلٹ جاں بحق جبکہ متعدد افراد زخمی ہوگئے۔
مزید پڑھیں:ایئر انڈیا طیارہ حادثہ ابتدائی تحقیقات: کیا پائلٹ نے طیارے کے انجنوں کو فیول کی فراہمی بند کی؟
حکام کے مطابق یہ حادثہ اتوار کی شب اس وقت پیش آیا جب مونٹریال سے آنے والی پرواز لینڈنگ کے دوران رن وے پر موجود فائر بریگیڈ کی گاڑی سے جا ٹکرائی۔ طیارے میں 72 مسافر اور عملے کے 4 ارکان سوار تھے۔
ابتدائی معلومات کے مطابق فائر بریگیڈ کی گاڑی ایک اور پرواز میں پیدا ہونے والی خرابی کے باعث رن وے پر موجود تھی۔ ائیر ٹریفک کنٹرول کی آڈیو ریکارڈنگ میں سنا جا سکتا ہے کہ کنٹرولر نے آخری لمحوں میں گاڑی کو رکنے کی ہدایت کی، تاہم تصادم نہ روکا جا سکا۔
حادثے میں طیارے کا اگلا حصہ شدید متاثر ہوا، جس کے باعث پائلٹ اور معاون پائلٹ موقع پر ہی جاں بحق ہوگئے۔ مجموعی طور پر 41 مسافروں اور 2 فائر فائٹرز کو اسپتال منتقل کیا گیا، جن میں سے کئی کو بعد ازاں فارغ کر دیا گیا جبکہ بعض کی حالت تشویشناک بتائی جا رہی ہے۔
امریکی اور کینیڈین حکام نے مشترکہ تحقیقات کا آغاز کر دیا ہے، جس میں خاص طور پر ائیر ٹریفک کنٹرول کے نظام اور رن وے کے انتظامات کا جائزہ لیا جا رہا ہے۔ امریکی صدر ڈونلڈ ٹرمپ نے واقعے کو افسوسناک قرار دیتے ہوئے کہا کہ بظاہر یہ ایک انسانی غلطی کا نتیجہ معلوم ہوتا ہے۔
مزید پڑھیں:کولمبیا میں طیارہ حادثہ، قانون ساز سمیت 15 افراد ہلاک
یہ حادثہ ایسے وقت پیش آیا ہے جب امریکی ہوابازی کے نظام کو عملے کی کمی اور دیگر انتظامی مسائل کا سامنا ہے، تاہم حکام کا کہنا ہے کہ اصل وجوہات تحقیقات مکمل ہونے کے بعد ہی سامنے آئیں گی۔
