ترکیہ کے نومنتخب صدر رجب طیب اردوان نے اپنے عہدے کا حلف اٹھا لیا ہے۔ اس کے لیے انقرہ میں تقریب کا انعقاد کیا گیا تھا۔
میڈیا رپورٹس کے مطابق رجب طیب اردوان جب حلف برداری کی تقریب میں شرکت کے لیے پہنچے تو وزیراعظم پاکستان شہباز شریف پہلے سے اس تقریب میں شریک ہیں۔
گرینڈ نیشنل اسمبلی کے اسپیکر نے صدر رجب طیب اردوان سے عہدے کا حلف لیا۔ حلف برداری کی تقریب میں کئی ممالک کے سربراہان مملکت شریک ہیں۔ وزیراعظم شہباز شریف نے ترکیہ کے صدر ر سے مصافحہ کیا اور مبارکباد پیش کی۔
اس موقع پر رجب طیب اردوان نے کہا میں ترکیہ میں آئین و قانون کی پاسداری اور جمہوری اقدار کو پروان چڑھاؤں گا۔ میں تیسری مرتبہ منتخب کرنے پر اپنے عوام کا شکریہ ادا کرتا ہوں۔
دوسری جانب ترکیہ کے میڈیا کا کہنا تھا کہ رجب طیب اردوان آج رات ہی اپنی کابینہ کا بھی اعلان کر دیں گے۔
یہ بھی پڑھیں ر ن آف الیکشن: رجب طیب اردوان نے میدان مار لیا، ترکیہ میں جشن
واضح رہے کہ رجب طیب اردوان 28 مئی کو ہونے والے رن آف الیکشن میں ترکیہ کے صدر منتخب ہوئے جنہوں نے 52 فیصد سے زائد ووٹ حاصل کیے تھے۔
اس سے قبل 14 مئی کو ترکیہ میں صدارتی انتخاب کے معرکے میں کسی بھی امیدوار کی جیت کا فیصلہ نہیں ہو سکا تھا کیوں کہ کوئی بھی 50 فیصد ووٹ حاصل کرنے میں کامیاب نہیں ہو سکا تھا۔
یہ بھی یاد رہے کہ رجب طیب اردوان تیسری مرتبہ ترکیہ کے صدر منتخب ہوئے ہیں۔
