اسرائیل نے اعلان کیا ہے کہ یروشلم کے لاطینی بطریرک کارڈینل پیئرباتستا پیزابالا کو عیسائیت کی مقدس ترین جگہ ہولی سیپولچر چرچ میں دوبارہ داخلے کی اجازت مل گئی ہے، یہ فیصلہ انہیں پام سنڈے پر چرچ میں داخل ہونے سے روکنے کے عالمی سطح پر شدید ردعمل کے بعد کیا گیا۔
پولیس نے سیکیورٹی وجوہات کا حوالہ دیتے ہوئے یروشلم کے لاطینی بطریرک کارڈینل پیئرباتستا پیزابالا کو چرچ میں داخل ہونے سے روکا تھا، کیونکہ ایران کے ساتھ جاری جنگ کے دوران عبادت گاہوں میں اجتماعات پر پابندی عائد تھی۔
اس واقعے پر عالمی ردعمل کے بعد اسرائیلی وزیرِ اعظم نے اعلان کیا کہ کارڈینل کو مکمل اور فوری رسائی دی جائے گی۔ یروشلم کے لاطینی بطریرک کارڈینل پیئرباتستا پیزابالا نے بعد میں ماؤنٹ آف اولیو پر چرچ آف آل نیشنز میں پام سنڈے کی نماز ادا کی اور کہا کہ جنگ سے قیامت مٹ نہیں سکتی اور غم امید کو بجھا نہیں سکتا۔
مزید پڑھیں:اسرائیل کا غزہ میں کیتھولک چرچ پر حملہ، 2 افراد جان سے گئے، پوپ لیو کا اظہار افسوس
یروشلم کے لاطینی بطریرک کارڈینل پیئرباتستا پیزابالا نے اس واقعے کو صدیوں میں پہلی بار چرچ کے سرکردہ عہدیداروں کو پام سنڈے کی تقریبات سے روکنے کا سنگین جرم قرار دیا۔ عالمی رہنماؤں اور یورپی یونین کے نمائندے پابندی کی مذمت کر چکے ہیں اور مذہبی آزادی کی ضمانت دینے کا مطالبہ کیا ہے۔
