کراچی پولیس نے بین الصوبائی اسلحہ اسمگلنگ میں ملوث ایک منظم گینگ کو گرفتار کیا ہے۔
ایس ایس پی ویسٹ طارق الہی مستوئی کے مطابق ملزمان مسافر بسوں کے ذریعے دیگر صوبوں سے غیر قانونی اسلحہ سندھ منتقل کرنے میں ملوث تھے۔
یہ بھی پڑھیں: منشیات اسمگلنگ میں ملوث این جی او بے نقاب، سرغنہ سمیت 3 ملزمان گرفتار
پولیس کے مطابق گلشن معمار تھانہ کے ایس ایچ او نے انٹیلیجنس بیسڈ کارروائی کے دوران بس ڈرائیور سمیت 5 ملزمان کو گرفتار کیا ہے۔
گرفتار افراد میں جہانگیر خان، نعمت اللہ، شیر علی، سلیمان اور امجد شامل ہیں، جن میں سے 3 افغان شہری بھی ہیں۔
ایس ایس پی ویسٹ کے مطابق ملزمان کے قبضے سے 5 پستول، 6 میگزین، بڑی تعداد میں گولیاں، نقدی اور موبائل فون برآمد کیے گئے ہیں۔
اس کے علاوہ اسلحہ کی اسمگلنگ میں استعمال ہونے والی مسافر کوچ کو بھی پولیس نے تحویل میں لے لیا ہے۔
مزید پڑھیں: اسلحہ اسمگلنگ کا الزام: وزیراعلیٰ سندھ نے اپنے مشیر کا استعفیٰ منظور کرلیا
پولیس حکام کا کہنا ہے کہ گرفتار بس ڈرائیور جہانگیر براہِ راست غیر قانونی اسلحہ کی خرید و فروخت میں ملوث تھا، جبکہ اس گینگ کا سرغنہ پشاور میں موجود ہے جو ایک منظم اسلحہ نیٹ ورک چلا رہا ہے۔
پولیس ترجمان کے مطابق دیگر ملوث ملزمان کی گرفتاری کے لیے چھاپے مارے جا رہے ہیں اور مزید معلومات حاصل کی جا رہی ہیں۔
ملزمان کے خلاف سندھ اسلحہ ایکٹ کے تحت مقدمات درج کرکے تفتیش کا آغاز کر دیا گیا ہے۔
