پاک بحریہ اور چینی پیپلز لبریشن آرمی نیوی کے درمیان مشترکہ مشق ’سی گارڈین فور‘ اختتام پذیر ہوگئی، جو 25 مارچ سے یکم اپریل تک جاری رہی اور اس کا مقصد آپریشنل ہم آہنگی اور باہمی تعاون کو فروغ دینا تھا۔
پاک فوج کے شعبہ تعلقات عامہ (آئی ایس پی آر) کے مطابق اس مشق میں کراچی میں 5 روزہ پورٹ فیز اور شمالی بحیرہ عرب میں 2 روزہ سی فیز شامل تھا۔ پورٹ وزٹ کے دوران پی ایل اے نیوی کے جہاز کا استقبال پی این ایس تیمور نے کیا۔
اس دوران وفود کے تبادلے، بحری تنصیبات کے تعارفی دورے، پیشہ ورانہ امور پر تبادلہ خیال اور سیمینار کا انعقاد بھی کیا گیا۔
مشق کے نتیجے میں آپریشنل اور حکمتِ عملی کی سطح پر ہم آہنگی مزید مستحکم ہوئی۔
یہ مشق بحیرہ عرب میں مشترکہ گشت کے ساتھ اختتام پذیر ہوئی، جس کے ذریعے دونوں بحری افواج نے علاقائی سمندری سلامتی اور استحکام کے لیے اپنے عزم کا اعادہ کیا۔
