ملک میں جاری سیاسی سرگرمیوں کے درمیان مختلف سیاسی رہنماؤں کی جانب سے مولانا فضل الرحمان سے ملاقاتوں کا سلسلہ تیز ہو گیا ہے، جس کے باعث ان کی رہائش گاہ ایک مرتبہ پھر اہم سیاسی مرکز کی حیثیت اختیار کر گئی ہے۔
رہنما جے یو آئی عالیہ کامران کے مطابق مختلف سیاسی شخصیات مولانا فضل الرحمان سے ملاقاتیں کر رہی ہیں تاہم ملاقاتوں کے ایجنڈے سے متعلق تفصیلات محدود ہیں۔ ان کا کہنا تھا کہ انہیں بھی اتنی ہی معلومات ہیں جتنی عمومی طور پر سامنے آرہی ہیں۔
مولانا فضل الرحمان کے در پر سب نے حاضریاں لگانا شروع کی ہوئی ہیں مولانا کی شخصیت ایسی ہے کہ خطے میں اپنا اَثَر و رُسُوخ رکھتی ہے خطے کے اندر ان کی بات کی اہمیت ہے ،خطے کی موجودہ صورتحال میں فضل الرحمان بہترین کردار ادا کرسکتے ہیں
رہنما جے یو آئی عالیہ کامران pic.twitter.com/iY1qwwPQ4C— WE News (@WENewsPk) April 2, 2026
انہوں نے کہا کہ مولانا فضل الرحمان کی شخصیت ملکی سیاست میں اثر و رسوخ رکھتی ہے اور قومی و علاقائی معاملات میں ان کے کردار کو نظر انداز نہیں کیا جا سکتا۔ اگرچہ پارلیمانی نشستیں زیادہ نہیں، لیکن سیاسی حیثیت اور اہمیت اپنی جگہ برقرار ہے۔
عالیہ کامران کے مطابق موجودہ داخلی اور خارجی صورتحال، خطے میں جاری بین الاقوامی پیش رفت اور سیاسی تناؤ کے تناظر میں مولانا فضل الرحمان مثبت کردار ادا کر سکتے ہیں اور معاملات کو بہتری اور استحکام کی طرف لے جانے کی صلاحیت رکھتے ہیں۔
