آزاد جموں و کشمیر ہاؤس میں قومی پیغام امن کمیٹی کی ایک تقریب منعقد ہوئی جس میں آزاد جموں و کشمیر کے صدر چوہدری لطیف اکبر بطور مہمانِ خصوصی شریک ہوئے۔ تقریب کی میزبانی چیئرمین پاکستان علماء کونسل اور قومی پیغام امن کمیٹی کے کوآرڈینیٹر حافظ طاہر اشرفی نے کی۔
تقریب میں کمیٹی کے اراکین نے بھی شرکت کی اور بتایا کہ قومی پیغام امن کمیٹی کل آزاد جموں و کشمیر کا دورہ کرے گی۔ اس موقع پر آزاد کشمیر حکومت اور کمیٹی کے درمیان تعاون کو فروغ دینے پر زور دیا گیا۔
یہ بھی پڑھیے: شمالی وزیرستان میں سیکیورٹی فورسز کی کارروائی، 8 خوارج ہلاک
حافظ طاہر اشرفی نے اپنے خطاب میں کہا کہ ’ترلائی حملے کے ایک گھنٹے کے اندر تمام علماء کی مذمت قومی وحدت کا مظاہرہ تھی‘۔ انہوں نے مزید کہا کہ ’ایران کے معاملے پر پوری قوم ایک ساتھ کھڑی ہے‘ اور ’پاکستان اس وقت دنیا کا مرکز بن چکا ہے جو ہمارے لیے باعثِ فخر ہے‘۔
انہوں نے کہا کہ خوارج ظلم کر رہے ہیں جبکہ پاک فوج ملک کے دفاع میں مصروف ہے۔ ان کے مطابق دنیا کی نظریں اس وقت اسلام آباد پر مرکوز ہیں۔
علامہ عارف واحدی نے کہا کہ دشمن ملک میں تقسیم پیدا کرنا چاہتے تھے لیکن قیادت نے ملی وحدت کے لیے کمیٹی تشکیل دی ہے۔ انہوں نے بتایا کہ وہ جلد آزاد کشمیر کے وزیراعظم سے ملاقات کریں گے اور پورے ملک میں امن و اتحاد کے پیغام کے لیے سرگرم ہیں۔
علامہ ضیاء اللہ شاہ بخاری نے کہا کہ اس وقت پاکستان کو اللہ نے بہت عزت دی ہے اور دنیا کے اہم امن فیصلے اسلام آباد میں ہو رہے ہیں۔ ان کے مطابق دشمن فرقہ واریت پھیلانا چاہتا ہے۔ علامہ راغب نعیمی نے کہا کہ قومی پیغام امن کمیٹی کا مقصد ملک میں امن، برداشت اور باہمی احترام کو فروغ دینا ہے اور یہ کمیٹی ہر قسم کی بدامنی کے خاتمے کے لیے کام کرے گی۔
تقریب میں صوبائی وزیر پنجاب سردار رمیش سنگھ اروڑہ اور راجیش کمار ہراداسانی نے بھی خطاب کیا۔ رمیش سنگھ نے کہا کہ پاکستان نے اقلیتوں کو ہمیشہ شمولیت کا پیغام دیا ہے جبکہ راجیش کمار نے کہا کہ پاکستان میں تمام مذاہب کو مکمل آزادی حاصل ہے۔
یہ بھی پڑھیے: فلسطینیوں کو سزائے موت دینے کا قانون قابل مذمت، آزاد فلسطینی ریاست قائم کی جائے، علامہ طاہر اشرفی
آزاد جموں و کشمیر کے صدر چوہدری لطیف اکبر نے تقریب سے خطاب کرتے ہوئے کہا کہ ’طاہر اشرفی کی کاوشیں قابلِ تحسین ہیں‘۔ انہوں نے کہا کہ آزاد کشمیر اور پاکستان کے عوام نے ہمیشہ ایک دوسرے کا ساتھ دیا ہے اور کشمیری عوام کی قربانیاں بے مثال ہیں۔
انہوں نے کہا کہ پاکستان نے عالمی سطح پر امن کے لیے توازن کا راستہ اختیار کیا ہے اور ثالثی کے ذریعے تنازعات کے حل کی کوشش ایک بڑی کامیابی ہے۔ تقریب کے اختتام پر تمام شرکاء نے ملک میں امن، یکجہتی اور بین المذاہب ہم آہنگی کے فروغ کے عزم کا اعادہ کیا۔
