وزیراعظم پاکستان شہباز شریف کی زیر صدارت وفاقی کابینہ کا اجلاس منعقد ہوا، جس میں اراکین نے امریکا ایران جنگ بندی پر وزیراعظم، وزیر خارجہ اور فیلڈ مارشل کو خراج تحسین پیش کیا۔ وزیراعظم کی آمد پر پورا ہال تالیوں سے گونج اٹھا۔ اجلاس میں وزیراعظم نے تمام کابینہ ارکان کا شکریہ ادا کیا۔
وزیراعظم نے کابینہ کو خلیج میں جاری کشیدگی کے خاتمے اور جنگ بندی کے لیے پاکستان کی جاری کوششوں کے حوالے سے اعتماد میں لیا۔
وفاقی کابینہ نے وزیراعظم شہباز شریف، نائب وزیراعظم و وزیرِ خارجہ سینیٹر اسحاق ڈار اور آرمی چیف و چیف آف ڈیفنس فورسز فیلڈ مارشل سید عاصم منیر کی جنگ بندی اور خطے میں امن کے لیے کوششوں پر انہیں خراج تحسین پیش کیا۔
کابینہ نے قوم سے اپیل کی کہ وہ جمعہ کے روز پاکستان کی کوششوں کے مثبت نتائج پر اللہ کے حضور شکر ادا کریں اور جنگ بندی کی مستقل امن میں تبدیلی و ملک کی ترقی و خوشحالی کے لیے خصوصی دعا کریں۔
اجلاس میں کابینہ ارکان نے پاکستان کی سفارتی محاذ پر کوششوں کو تاریخی قرار دیتے ہوئے ملکی معاشی ترقی کے لیے عزم کا اعادہ کیا۔
کابینہ ارکان کا کہنا تھا کہ وزیراعظم شہباز شریف اور آرمی چیف فیلڈ مارشل عاصم منیر نے انتہائی کشیدہ حالات میں فریقین کو جنگ بندی پر راضی کرکے نہ صرف پاکستان بلکہ پوری قوم کا سر فخر سے بلند کیا ہے، اور خطہ مستقل امن کی جانب تیزی سے گامزن ہے۔
