وفاقی حکومت نے 2 روز کے لیے پیٹرولیم مصنوعات کی قیمتیں برقرار رکھنے کا اعلان کیا ہے۔
پیٹرولیم ڈویژن نے واضح کیا ہے کہ 26 اور 27 جولائی کو پیٹرولیم مصنوعات کی قیمتوں میں کوئی تبدیلی نہیں کی جائے گی اور 25 جولائی کو نافذ قیمتیں ہی برقرار رہیں گی۔
پیٹرولیم ڈویژن کی جانب سے جاری وضاحتی اعلامیے کے مطابق ویک اینڈ کے دوران بین الاقوامی مارکیٹ میں پلیٹس کی قیمتیں جاری نہ ہونے کے باعث پیٹرولیم مصنوعات کی نئی قیمتوں کا تعین ممکن نہیں، اسی لیے موجودہ نرخ برقرار رکھنے کا فیصلہ کیا گیا ہے۔
اعلامیے میں کہا گیا ہے کہ ہائی اسپیڈ ڈیزل کی قیمت 383 روپے 46 پیسے فی لیٹر برقرار رہے گی، جبکہ موٹر اسپرٹ (پیٹرول) بدستور 335 روپے 18 پیسے فی لیٹر کے حساب سے فروخت کیا جائے گا۔
پیٹرولیم ڈویژن نے مزید بتایا کہ یہ وضاحت 24 جولائی کو جاری کی گئی پریس ریلیز کے حوالے سے سامنے آنے والے ابہام کو دور کرنے کے لیے جاری کی گئی ہے، جس کے تحت 26 اور 27 جولائی کے دوران 25 جولائی کو نافذ قیمتیں ہی قابل عمل رہیں گی۔
واضح رہے کہ حکومت کی جانب سے متعارف کرائے گئے نئے نظام کے تحت اب پیٹرولیم مصنوعات کی قیمتوں کا تعین روزانہ کی بنیاد پر کیا جاتا ہے۔
