پاکستان نے عراق کے شہر بصرہ میں کویت کے قونصل خانے پر حملے اور املاک کو نقصان پہنچانے کی اطلاعات پر گہری تشویش کا اظہار کیا ہے۔
ترجمان دفتر خارجہ نے ایک بیان میں کہاکہ گزشتہ روز قونصل خانے کی حدود کی خلاف ورزی اور اس کی تقدس کی پامالی ایک قابل مذمت اقدام ہے۔
بیان میں اس واقعے کی شدید مذمت کرتے ہوئے کہا گیا ہے کہ یہ اقدام سفارتی آداب اور بین الاقوامی قانون، خصوصاً ویانا کنونشن برائے قونصلر تعلقات کے اصولوں کے منافی ہے۔
وزارت خارجہ نے کہاکہ سفارتی اور قونصلر مشنز کی حفاظت اور تقدس کو یقینی بنانا انتہائی ضروری ہے، اس واقعے کی مکمل تحقیقات اور ذمہ داران کے خلاف کارروائی کی جانی چاہیے۔
پاکستان نے کویت کی حکومت اور عوام کے ساتھ یکجہتی کا اظہار کیا اور سفارتی مشنز کے احترام اور بین الاقوامی ذمہ داریوں کی پابندی کے اپنے اصولی مؤقف کی تصدیق کی۔
