وزیر دفاع خواجہ آصف نے کہا ہے کہ پاکستان کی سفارتی کوششوں سے امریکا اور ایران کے درمیان ہونے والی جنگ بندی پر ہمارا ہمسایہ بھارت پریشان ہے کہ یہ کیا ہوگیا۔
نجی ٹی وی سے گفتگو کرتے ہوئے انہوں نے کہاکہ امریکی صدر ڈونلڈ ٹرمپ کے ذہن میں تھا کہ مسئلے کا حل نکلنا چاہیے، کسی بھی مرحلے پر تمام دروازے بند نہیں کیے گئے تھے۔
انہوں نے کہاکہ پاکستان کو اللہ نے عزت دی اور ہماری قیادت نے اپنا ایک مقام بنایا ہے، اور اس کا کوئی نہ کوئی نتیجہ ضرور نکلنا ہے۔
وزیر دفاع نے کہاکہ پاکستان اور یو اے ای کے درمیان مضبوط تعلقات ہیں، یہ تاثر درست نہیں کہ یو اے ای پاکستان سے ناراض ہے۔
ایک سوال کے جواب میں انہوں نے کہاکہ دوست ممالک سے متعلق قیاس آرائیوں کو میں درست نہیں سمجھتا۔
وزیر دفاع کا مزید کہنا تھا کہ ایران اور خلیجی ممالک کا اعتماد مسلسل پاکستان کو حاصل رہا، ہم آگے بھی اپنا کردار ادا کرتے رہیں گے۔
