معروف بھارتی اداکار پریش راول نے ہیرا پھیری 3 کے تنازع کے بعد اداکار و پروڈیوسر اکشے کمار کے ساتھ اپنے تعلقات کے حوالے سے وضاحت کرتے ہوئے کہا ہے کہ دونوں کے درمیان کسی قسم کی بددلی موجود نہیں۔
ایک حالیہ انٹرویو میں پریش راول نے کہا کہ یہ معاملہ ہرگز ذاتی تعلقات پر اثر انداز نہیں ہوا۔ ان کے بقول ’یہ دوستی کا معاملہ نہیں تھا اور نہ ہی اس پر کبھی کوئی آنچ آئی۔ بعض اوقات قریبی تعلقات میں لوگ ایک دوسرے کو معمولی سمجھ لیتے ہیں مگر ہمارے درمیان کوئی بددلی نہیں ہے‘۔
یہ بھی پڑھیں: پریش راول کی چھٹی، ’ہیرا پھیری 3‘ میں بابو راؤ کا کردار کون سا اداکار ادا کرے گا؟
یاد رہے کہ گزشتہ سال پریش راول کی جانب سے اچانک فلم چھوڑنے کے اعلان کے بعد اس منصوبے کو بڑا دھچکا پہنچا تھا۔ بعد ازاں اکشے کمار نے ان پر25 کروڑ روپے ہرجانے کا دعویٰ دائر کیا تھا۔ تاہم چند ماہ بعد پریش راول دوبارہ اس پراجیکٹ کا حصہ بن گئے۔
واضح رہے کہ ہیرا پھیری فرنچائز کی پہلی فلم 2000 میں جبکہ اس کا سیکوئل ’پھر ہیرا پھیری‘ 2006 میں ریلیز ہوا تھا۔ دونوں فلمیں شائقین میں بے حد مقبول رہیں۔
