امریکی صدر ڈونلڈ ٹرمپ نے ایران کے ساتھ جاری حالیہ تنازع اور اسلام آباد میں ہونے والے مذاکرات کے حوالے سے اہم بیان جاری کرتے ہوئے کہا ہے کہ ان مذاکرات کا حتمی نتیجہ اگلے 24 گھنٹوں میں دنیا کے سامنے آجائے گا۔ صدر ٹرمپ نے واضح کیا کہ تہران کے پاس مذاکرات کے علاوہ کوئی دوسرا راستہ موجود نہیں ہے۔
یہ بھی پڑھیں: دنیا کا سب سے طاقتور ری سیٹ ہوگیا، یہ بات ہمارے دشمنوں سے پوچھ لیں، ڈونلڈ ٹرمپ
صدر ٹرمپ نے سخت لہجہ اپناتے ہوئے کہا، ‘اگر ایرانی آج زندہ ہیں تو اس کی واحد وجہ مذاکرات ہیں’۔ انہوں نے مزید کہا کہ ایرانی قیادت کو اس حقیقت کا ادراک ہونا چاہیے کہ عالمی سطح پر ان کے پاس اب کھیلنے کے لیے کوئی مؤثر کارڈ باقی نہیں بچا۔
صدر ٹرمپ نے ایران کی حکمت عملی پر کڑی تنقید کرتے ہوئے کہا کہ ایران کے پاس بین الاقوامی آبی گزرگاہوں میں دنیا سے قلیل مدتی ‘بھتہ خوری’ کرنے کے سوا کوئی چارہ نہیں۔ ان کے بقول، تہران اس طرح کے ہتھکنڈوں سے عالمی دباؤ کم کرنے کی کوشش کر رہا ہے، لیکن اس کی پوزیشن انتہائی کمزور ہے۔
یہ بھی پڑھیں: ایران کے گرد امریکی فوج بدستور موجود رہے گی، ڈونلڈ ٹرمپ کا اعلان
امریکی اخبار سے گفتگو کے دوران اسلام آباد میں ہونے والی ان اہم سفارتی ملاقاتوں پر تبصرہ کرتے ہوئے امریکی صدر کا کہنا ہے کہ بہت جلد معلوم ہوجائے گا کہ یہ عمل کامیاب رہا یا نہیں۔ انہوں نے خبردار کیا، ‘اگر مذاکرات کامیاب نہ ہوئے تو امریکہ اپنی فوجی کارروائیاں دوبارہ شروع کرنے میں دیر نہیں کرے گا’۔
اس سے قبل ڈونلڈ ٹرمپ نے اپنے پیغام میں کہا کہ دنیا کا سب سے طاقتور ری سیٹ ہوگیا ہے، یہ بات ہمارے دشمنوں سے پوچھ لیں۔
سوشل میڈیا جاری اپنے مختصر بیان میں انہوں نے کہاکہ پلانٹیر ٹیکنالوجیز نے جنگی کارروائیوں میں اپنی مضبوط صلاحیتوں کو ثابت کردیا۔
واضح رہے کہ پاکستان کے دارالحکومت اسلام آباد میں ہونے والے یہ مذاکرات خطے میں کشیدگی کم کرنے کے حوالے سے انتہائی اہمیت کے حامل قرار دیے جارہے ہیں۔ اب پوری دنیا کی نظریں اگلے 24 گھنٹوں پر ٹکی ہیں کہ کیا سفارت کاری جنگ کے بادل چھٹ پائے گی یا خطہ ایک نئے فوجی تصادم کی طرف بڑھے گا۔
