چین کی برآمدات میں مارچ کے دوران صرف 2.5 فیصد اضافہ ریکارڈ کیا گیا، جو گزشتہ دو ماہ کے مقابلے میں نمایاں سست روی ظاہر کرتا ہے، جبکہ ایران جنگ کے باعث عالمی معیشت میں غیر یقینی صورتحال بڑھ گئی ہے۔
چین کے کسٹمز ادارے کی جانب سے جاری کردہ اعداد و شمار کے مطابق مارچ میں برآمدات کی شرح ماہرین کے اندازوں سے کم رہی۔ اس سے قبل جنوری اور فروری میں برآمدات میں 21.8 فیصد کا نمایاں اضافہ دیکھا گیا تھا۔
یہ بھی پڑھیے: مشرق وسطیٰ جنگ عالمی معیشت کے لیے خطرہ، شرحِ نمو اور مہنگائی پر شدید اثرات متوقع، سربراہ ورلڈ ورلڈ بینک
دوسری جانب درآمدات میں غیر معمولی تیزی دیکھی گئی اور مارچ میں یہ 27.8 فیصد تک پہنچ گئیں، جبکہ سال کے ابتدائی دو ماہ میں یہ شرح 19.8 فیصد تھی۔
ماہرین کے مطابق 2026 کے آغاز میں چین کی برآمدات کو ٹیکنالوجی سے متعلق مصنوعات، خصوصاً سیمی کنڈکٹرز کی عالمی طلب اور مصنوعی ذہانت کے بڑھتے رجحان نے سہارا دیا۔ تاہم ایران جنگ کے طویل ہونے سے توانائی کی قیمتوں میں اتار چڑھاؤ اور عالمی طلب متاثر ہونے کا خدشہ ہے، جو چین کی برآمدات پر بھی اثر انداز ہو سکتا ہے۔
معاشی تجزیہ کاروں کا کہنا ہے کہ اگر عالمی سطح پر غیر یقینی صورتحال برقرار رہی تو آئندہ مہینوں میں چین کی تجارتی کارکردگی مزید دباؤ کا شکار ہو سکتی ہے۔
