وفاقی دارالحکومت میں سیکیورٹی کے فول پروف انتظامات کیے گئے ہیں اور آئی جی اسلام آباد کی ہدایات پر شہر کے مختلف علاقوں میں بڑے پیمانے پر گرینڈ کومبنگ سرچ آپریشنز جاری ہیں۔
اسلام آباد پولیس کے ترجمان نے بتایا کہ تھانہ سیکریٹریٹ، گولڑہ، انڈسٹریل ایریا، ہمک، بنی گالہ، ترنول اور کھنہ کے علاقوں میں سرچ آپریشنز کیے گئے، جو زونل ایس پیز کی زیر نگرانی انجام دیے گئے۔ ان کارروائیوں میں لیڈیز پولیس نے بھی حصہ لیا۔
یہ بھی پڑھیے: اسلام آباد پولیس کی بڑے پیمانے پر گرینڈ سرچ آپریشنز، مشکوک عناصر اور غیر قانونی مقیم افراد کو نشانہ بنایا گیا
پولیس کے مطابق سرچ آپریشنز کے دوران 701 افراد اور 262 گھرانوں کی چیکنگ کی گئی، جبکہ 83 دکانوں اور 48 ہوٹلوں کی تلاشی لی گئی۔ اس کے علاوہ 251 موٹر سائیکلوں اور 117 گاڑیوں کی جانچ پڑتال بھی کی گئی۔
کارروائیوں کے دوران 27 مشکوک افراد اور 23 موٹر سائیکلوں کو مزید تفتیش کے لیے متعلقہ تھانوں میں منتقل کیا گیا۔
ترجمان کا کہنا ہے کہ شہر کے داخلی و خارجی راستوں پر مؤثر نگرانی کے لیے خصوصی چیکنگ پوائنٹس قائم کیے گئے ہیں، جبکہ تمام پٹرولنگ یونٹس اور خصوصی اسکواڈ شہر بھر میں مسلسل گشت کر رہے ہیں۔ سینیئر افسران بھی فیلڈ میں موجود ہیں اور سیکیورٹی انتظامات کا جائزہ لے رہے ہیں۔
یہ بھی پڑھیے: غیر ملکی وفود کی آمد، اسلام آباد پولیس کی جانب سے شہریوں کے لیے ٹریفک ایڈوائزری جاری
اسلام آباد پولیس نے شہریوں سے اپیل کی ہے کہ چیکنگ کے دوران پولیس سے تعاون کریں اور کسی بھی مشکوک سرگرمی کی فوری اطلاع دیں، تاکہ شہر میں امن و امان کو یقینی بنایا جا سکے۔
