اسلام آباد میں بین الاقوامی وفود کی آمد اور ان کی نقل و حرکت کے پیشِ نظر اسلام آباد پولیس کے ترجمان نے ایک اہم ٹریفک ایڈوائزری جاری کی ہے، جس کا مقصد سکیورٹی اور ٹریفک کی روانی کے درمیان توازن برقرار رکھنا ہے۔
ترجمان اسلام آباد پولیس کے مطابق شہر کے مختلف علاقوں میں غیر ملکی وفود کی آمد و رفت کا سلسلہ جاری ہے، جس کے باعث سکیورٹی پروٹوکول کے تحت وقفے وقفے سے ٹریفک کی آمد و رفت کو محدود کیا جارہا ہے۔
یہ بھی پڑھیں: اسلام آباد مذاکرات: بات چیت کے دروازے بند نہیں کیے، امریکی نائب صدر،ایک نشست میں معاہدہ ممکن نہیں، رابطے جاری رہیں گے، تہران
پولیس حکام کا کہنا ہے کہ وفود کی بحفاظت منتقلی کے لیے مختلف اوقات میں کلب روڈ، مری روڈ اور ایکسپریس ہائی وے پر ٹریفک کو عارضی طور پر روکا جا رہا ہے۔
اس کے علاوہ ریڈ زون کی سکیورٹی کو مزید سخت کرتے ہوئے تمام داخلی و خارجی راستے تاحال بند رکھے گئے ہیں، جس کی وجہ سے شہریوں کو متبادل راستے اختیار کرنے میں دشواری کا سامنا کرنا پڑ سکتا ہے۔
ترجمان اسلام آباد پولیس نے شہریوں سے اپیل کی ہے کہ وہ کسی بھی قسم کی زحمت اور سفر میں تاخیر سے بچنے کے لیے غیر ضروری نقل و حرکت سے گریز کریں۔
یہ بھی پڑھیں: ’دیکھا جائے گا کہ صورتحال کس طرف جاتی ہے‘، ڈونلڈ ٹرمپ کا اسلام آباد مذاکرات پر تبصرہ
شہریوں کو ہدایت کی گئی ہے کہ وہ سڑکوں پر موجود ڈائیورشنز کے دوران صبر و تحمل کا مظاہرہ کریں اور ڈیوٹی پر مامور قانون نافذ کرنے والے اداروں کے اہلکاروں کے ساتھ بھرپور تعاون کو یقینی بنائیں۔
مزید برآں، شہریوں کی سہولت کے لیے اسلام آباد پولیس نے اپنے سوشل میڈیا پیجز اور آفیشل واٹس ایپ چینل کو فعال کر دیا ہے جہاں سے لمحہ بہ لمحہ ٹریفک کی تازہ ترین صورتحال معلوم کی جا سکتی ہے۔
انتظامیہ نے واضح کیا ہے کہ یہ تمام اقدامات معزز مہمانوں کی حفاظت اور شہر کے امن و امان کے لیے کیے گئے ہیں، لہٰذا شہری گھر سے نکلنے سے پہلے روٹ پلاننگ کو ٹریفک اپ ڈیٹس کے مطابق ترتیب دیں۔
