وزیراعظم محمد شہباز شریف اپنے سرکاری دورے پر قطر کے دارالحکومت دوحہ پہنچ گئے جہاں ان کا پرتپاک استقبال کیا گیا، جبکہ اس دورے کے دوران امیرِ قطر سے اہم ملاقات میں دوطرفہ تعلقات اور خطے کی صورتحال پر تبادلہ خیال متوقع ہے۔
یہ بھی پڑھیں:وزیراعظم شہباز شریف کی سعودی ولی عہد سے ملاقات، امن کوششوں، دفاعی تعاون اور دوطرفہ تعلقات پر تبادلہ خیال
وزیراعظم آفس کے مطابق دوحہ پہنچنے پر قطر کے وزیرِ مملکت برائے خارجہ امور سلطان بن سعد المریخی نے وزیراعظم اور پاکستانی وفد کا استقبال کیا، جبکہ قطری مسلح افواج کے چاک و چوبند دستے نے وزیراعظم کو سلامی پیش کی۔ اس موقع پر دوحہ ائیرپورٹ اور شہر کو پاکستانی پرچموں سے بھی سجایا گیا۔
بیان کے مطابق وزیراعظم شہباز شریف اپنے دورے کے دوران امیرِ قطر شیخ تمیم بن حمد آل ثانی سے ملاقات کریں گے، جس میں دوطرفہ تعلقات کے فروغ، اقتصادی تعاون اور خطے و عالمی امن کے لیے جاری سفارتی کوششوں پر تبادلہ خیال کیا جائے گا۔
یہ بھی پڑھیں:سعودی عرب سے 2 ارب ڈالر کی آمد، اسٹاک مارکیٹ میں زبردست تیزی، ہنڈریڈ انڈیکس 1 لاکھ 70 ہزار سے اوپر
وزیراعظم کے ہمراہ نائب وزیرِ اعظم و وزیرِ خارجہ سینیٹر محمد اسحاق ڈار، وزیرِ اطلاعات و نشریات عطا اللہ تارڑ، معاون خصوصی طارق فاطمی اور بین الاقوامی میڈیا کے لیے وزیراعظم کے ترجمان مشرف زیدی بھی موجود ہیں۔
