سائنسی اور خلائی امور پر گہری نظر رکھنے والے قارئین کے لیے یہ ایک بڑی اور تاریخی پیش رفت ہے۔ چین اور یورپی خلائی ایجنسی (ای ایس اے) کے مشترکہ تعاون سے تیار کردہ خصوصی سیٹلائٹ ’اسمائل‘ کو فرانسیسی گیانا کے کورو خلائی مرکز سے یورپی راکٹ ’ویگا سی‘ کے ذریعے کامیابی سے خلا میں روانہ کردیا گیا ہے۔
چین اور یورپی خلائی ایجنسی کے درمیان خلائی سائنس کی تاریخ میں یہ اپنی نوعیت کا پہلا مکمل اور گہرا مشن لیول تعاون ہے، جس کی کامیابی کو دونوں خطوں کے خلائی روابط میں ایک بڑی بریک تھرو قرار دیا جارہا ہے۔ سیٹلائٹ نے خلا میں پہنچ کر اپنے سولر پینل کامیابی سے کھول دیے ہیں اور اس نے اپنے مقررہ مدار میں کام شروع کردیا ہے۔
یہ بھی پڑھیں: نایاب ترین نظارہ: ’افراتفری کا دیوتا‘ نامی سیارچہ پاکستان سمیت دنیا بھر میں بنا دوربین کب دیکھا جاسکے گا؟
اس سیٹلائٹ کا نام ’اسمائل‘ (سولر ونڈ میگنیٹو اسفیئر آئرونوسفیئر لنک ایکسپلورر) ایک خوبصورت سائنسی استعارے پر مبنی ہے۔ سیٹلائٹ پر موجود ایکس رے امیجر کے ذریعے جب زمین کی حفاظتی مقناطیسی تہہ (میگنیٹو اسفیئر) اور سورج کی ہواؤں کے ٹکراؤ کو دیکھا جائے گا، تو وہ منظر خلا میں ایک ’مسکراتی ہوئی قوس‘ کی طرح دکھائی دے گا، اسی لیے اسے کائناتی مسکراہٹ کا نام دیا گیا ہے۔
سائنسی ماہرین کے مطابق یہ مشن پہلی بار ایکس رے امیجنگ ٹیکنالوجی کا استعمال کرتے ہوئے سورج کی ہواؤں اور زمین کے مقناطیسی میدان کے باہمی ملاپ کا پینورامک نظارہ پیش کرے گا۔ اس سے سائنسدانوں کو یہ سمجھنے اور تجزیہ کرنے میں مدد ملے گی کہ سورج کا پورا نظام زمین کے ماحول پر کس طرح اثر انداز ہوتا ہے اور زمین کا مقناطیسی میدان کس طرح ہمیں نقصان دہ شمسی ہواؤں سے بچاتا ہے۔
اس منصوبے میں سب سے اہم بات یہ ہے کہ ماضی کے برعکس، جہاں چین یورپی ٹیکنالوجی سے سیکھتا تھا، اس بار سیٹلائٹ کے مین سسٹم ڈیزائن، پلیٹ فارم کی تیاری اور فائنل ٹیسٹنگ کی قیادت مکمل طور پر چینی اکیڈمی آف سائنسز نے کی ہے۔ سیٹلائٹ کے دیگر آلات کی تیاری میں برطانیہ کی لیسٹر یونیورسٹی اور کینیڈا کے پیچھے ہٹنے کے بعد چینی اداروں نے ای ایس اے کے ساتھ مل کر کام مکمل کیا۔
یہ بھی پڑھیں: زمین پر آخری مکمل سورج گرہن، سائنسدانوں نے کائناتی نظارے کے خاتمے کے وقت کا تعین کردیا
سیٹلائٹ کو لانچنگ مدار سے اس کے اصل مشن مدار تک پہنچانے کے لیے چین کا پروپلشن سسٹم اور ٹریکنگ ٹیکنالوجی انتہائی اہم ثابت ہوئی، جس کے لیے انجن کو 13 سے زائد بار چلایا گیا۔ خلا میں اس کے کنٹرول اور مانیٹرنگ کے لیے چین اور یورپ کے گراؤنڈ اسٹیشن نیٹ ورک مل کر کام کر رہے ہیں، جس کے لیے دونوں اطراف کے خلائی مراکز کے درمیان ڈیٹا لنکس قائم کیے گئے ہیں۔
مشن کے مینیجرز کا کہنا ہے کہ یہ کامیابی دونوں ممالک کے گہرے باہمی اعتماد کا نتیجہ ہے اور مستقبل میں ایسے مزید منصوبوں پر کام کیا جائے گا، جس میں مصنوعی ذہانت (اے آئی) کا استعمال بھی شامل ہوگا۔ اس کے علاوہ چین اب جنوب مشرقی ایشیا، مشرقِ وسطیٰ اور افریقہ کے ممالک کو بھی زمین اور سمندروں کی نگرانی کے لیے سول اسپیس ٹیکنالوجی فراہم کرنے کے بین الاقوامی پلیٹ فارم پر کام کررہا ہے۔
