سی ٹی ڈی کی بروقت کارروائی سے پشاور بڑی تباہی سے بچ گیا ہے، شینے گروپ کے خلاف ایک کمپاؤنڈ میں کارروائی کے دوران ایک دہشت گرد کو ہلاک کر دیا گیا جبکہ دہشت گردوں سے 5 کلو بارودی مواد سمیت بھاری مقدار میں کارتوس اور اسلحہ برآمد کر لیا گیا ہے۔
سینئیر سپرنٹنڈنٹ آف پولیس (ایس ایس پی) کاؤنٹر ٹیررازم ڈیپارٹمنٹ (سی ٹی ڈی) کاشف آفتاب عباسی نے پشاور پولیس لائن میں پریس کانفرنس کرتے ہوئے کہا کہ کارروائی کے وقت کمپاؤنڈ میں 5 سے 6 دہشت گرد موجود تھے، جو اندھیرے کا فائدہ اٹھاتے ہوئے فرار ہوگئے، تاہم علاقے کو گھیرے میں لے رکھا ہے اور سرچ آپریشن جاری ہے۔
کاشف آفتاب عباسی کا کہنا تھا کہ دہشت گرد گروپ شینے کے نام سے جانا جاتا ہے، جس میں 10 سے 12 لوگ شامل ہیں، کارروائی کے دوران ملزمان سے 5 کلو سے زائد باردوی مواد بھی برآمد کیا گیا جو شہر میں بڑی کارروائی کے لیے استعمال کیا جانا تھا۔
ایس ایس پی نے مزید کہا کہ سی ٹی ڈی اپنی استعداد کار کو بڑھا رہا ہے، ان کا کہنا تھا متنی اور ادیزی کے علاقوں میں ٹی ٹی پی کے کارندے موجود ہیں، جن کے خلاف کارروائیاں جاری ہیں۔
