ارجنٹائن کے عالمی شہرت یافتہ فٹبالر اور امریکی کلب انٹر میامی کے کھلاڑی لیونل میسی نے اسپین کے شہر بارسلونا میں قائم پانچویں ڈویژن کے فٹبال کلب یو ای کورنیلا کو خرید لیا ہے۔
کلب کی جانب سے اس معاہدے کا باضابطہ اعلان کیا گیا ہے تاہم خریداری کی مالی تفصیلات ظاہر نہیں کی گئیں۔ بیان میں کہا گیا کہ میسی کی شمولیت کلب کی تاریخ میں ایک نئے باب کا آغاز ہے۔ یہ منصوبہ طویل المدتی وژن، اسٹریٹجک منصوبہ بندی، پائیداری اور مقامی کمیونٹی سے مضبوط وابستگی پر مبنی ہے۔
یہ بھی پڑھیں: ارجنٹائن کے عالمی کپ فاتح لیونل میسی کے 900 گول، فٹ بال کی نئی تاریخ رقم
کورنیلا کی بنیاد 1951 میں رکھی گئی تھی اور اس نے کئی کھلاڑی تیار کیے ہیں، جن میں آرسنل کے گول کیپر ڈیوڈ رایا اور بارسلونا کے سابق ڈیفنڈر جورڈی آلبا شامل ہیں، جو میسی کے ساتھ انٹر میامی میں بھی کھیل چکے ہیں۔
لیونل میسی اپنے دور کے بہترین کھلاڑی رہے ہیں۔ انہوں نے بارسلونا میں دو دہائیوں کے دوران متعدد ٹائٹل اور کئی بار بیلون ڈی اور ایوارڈ جیتے۔ اس کے بعد وہ 2021 میں کلب سے الگ ہو گئے۔
یہ بھی پڑھیں: ریٹائرمنٹ کے بعد لیونل میسی کیا کرنا پسند کریں گے؟ فٹبالر نے خود بتادیا
38 سالہ لیونل میسی اس وقت اپنے کیریئر کے آخری مرحلے میں ہیں اور رواں سال شمالی امریکہ میں ہونے والے ورلڈ کپ کی تیاری کر رہے ہیں، جہاں ارجنٹائن اپنے ٹائٹل کا دفاع کرے گا۔
